Skip to main content

Taasineq: Marlunnik qinigaaffeqartut qanoq isumaqarfigaagit?

Marlunnik qinigaaffeqartut pillugit atuartartut isumaat Sermitsiaq.AG-p paaserusuppaa, taamaammat taasisitsinermik sanavugut, atuartartugut taasisinnaaniassammata.

Inatsisartuni ilaasortani 31-iusuni arfineq-pingasut marlunnik qinigaaffeqarput.

Inuit Ataqatigiinnit pingasut, Siumumit pingasut Demokraatiniillu marluk kommunalbestyrelsemi aamma ilaasortaapput.

Nunatsinni kommunit tallimaapput. Taakkunannga kommunit sisamat kommunalbestyrelsemi ilaasortaatitaasa ilaat Inatsisartuni aamma ilaasortaapput. Avannaata Kommuniani kommunalbestyrelsemi ilaasortat kisimik marlunnik qinigaaffeqartoqanngillat.

Qinigaasunut akissarsiaritinneqartut

Kommuneqarfik Sermersuumi kommunalbestyrelsemi ilaasortat qaammammut 12.392,67 koruuninik akissarsiaqartinneqartarput. Tassa ukiumut 148.712,04 koruuninik akissarsiaqartinneqartarlutik.

Kommunalbestyrelsemi ilaasortat ataatsimiititaliani siulittaasuusut qaammammut 8.261,71 koruuninik tapisiaqartinneqartarput, tassa ukiumut tapisiassat 99.141 koruuniullutik.

Kommunalbestyrelsemi ilaasortaq Inatsisartuni ilaasortaaffeqaruni, taava qaammammut akissaateqarluassaaq.

Taakkuinnaanngillalli. Politikeri marlunnik qinigaaffeqartoq kommunalbestyrelsemi ataatsimiinnernut pilersaarutigineqareersunut peqataasinnaanngippat, taava sinniisoq siulleq ataatsimiinnermi peqataassaaq. Sinniisoq ataatsimiinnermi ataatsimi ullormut 400 koruuninik akissarsiassaqartinneqartarpoq, suliffimminiillu uppernarsaammik tunniussisinnaaguni, suliffimminit akissarsiassanit annaasassani kommunimit aamma matussusertissinnaasarlugit.

Illit qanoq isumaqarpit?

Politikerit marlunnik qinigaaffeqartarnerat ajunngila?

Imaluunniit politikerit marlunnik qinigaaffeqaratik politikkikkut sulineq ataaseq kisiat aallutarissavaat, taamaasilluni Inatsisartuni aamma kommunalbestyrelsemi politikerit sulisut amerlanerulersillugit?

Sermitsiaq.AG facebookimi quppernermini taasisitsivimmik sanavoq, tassanilu taaseqataanissarnut periarfissaqarputit. 

Assiliami Facebookip ilisarnaataa “F” toorlugu taaseqataasinnaavutit.

Inuiaqatigiilerinermik ilisimatooq mianersoqqusivoq

Inuiaqatigiilerinermik ilisimatooq, Birger Poppel isumaqarpoq marlunnik qinigaaffeqartut politikkimi sulinerminni piareersarnissamut suliassanilu pingaaruteqartuni aalajangiiffigisassani itinerusumik suliaqarnissaminnut piffissakippallaalersoorsinnaasartut.

- Politikerit Inatsisartunut kommunalbestyrelsemullu ataatsimiinnissanut angalasaqattaartarnerisa kingunerisinnaavaat suliassanut piareersarnissaq naammagunnaartartoq, suliassanullu itinerusumik misissuinissaminnut politikerit piffissaqarsinnaanngitsut. Politikerillu taama ulapaartigippata, inuusuttunut politikkernermik suliaqarnissamik soqutiginnittunut tamanna kukkusumik takutitsisinnaavoq. Tassa politikeriussagaanni ulloq unnuarlu sulisoqartariaqartoq, Birger Poppel oqarpoq.

Marlunnik qinigaaffeqarneq imaluunniit naamik

Siumut nuna tamakkerlugu 2017-imi ataatsimeersuarnermini marlunnik qinigaaffeqarneq pillugu oqaluuserisaqarpoq. Tassani partiimi amerlanerussuteqartunit aalajangerneqarpoq marlunnik qinigaaffeqartut Inatsisartuni kommunalbestyrelsemiluunniit sulerusunnerlutik toqqartalissagaat.

Amerlanerussuteqartut aalajangernerannit ukioq ataaseq qaangiummat partiimi qullersat aalajangiineq malinnagu allatut iliorput, tassani tunngavilersuutigineqarluni partiip soqutigisaat illersornissaat pisariaqarpat marlunnik qinigaaffeqartoqarsinnaasoq, aalajangersakkani allassimasoq.

- Aalajangersakkatsinni allassimavoq, siunissami politikkikkut siunniuteqarsinnaaneq pineqartillugu, aaqqiissutit aalajangersakkanut naapertuutinngikkaluarpataluunniit aaqqiissuteqarsinnaasugut, Mikael Petersen Sermitsiaq.AG-mut nassuiaavoq.

Læs hele sagen:

  1. Hver fjerde Inatsisartut-politiker har et dobbeltmandat
  2. Inatsisartuni politikerit sisamararterutaat marlunnik qinigaaffeqarput
  3. Dobbeltmandater risikerer at svække demokratiet
  4. Marlunnik qinigaaffillit tamat oqartussaanerannik innarliisinnaasut
  5. IA Nuuk marlunnik qinigaaffeqartitsinngilaq
  6. Ingen dobbeltmandater i IA Nuuk
  7. IA Nuuk marlunnik qinigaatitaqarusunngilaq
  8. Hvad mener du om dobbeltmandater?
  9. Afskaf dobbeltmandater
  10. Marlunnik qinigaaffeqarneq atorunnaarli
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER