Skip to main content

Inuiaqatigiilerinermik ilisimatooq: Marlunnik qinigaaffillit tamat oqartussaanerannik innarliisinnaasut

Inatsisartuni kommunalbestyrelsenilu marlunnik qinigaaffillit arlaqarnerat pissutigalugu tamat oqartussaanerat innarlerneqaratarsinnaasoq, inuiaqatigiilerinermik ilisimatooq Birger Poppel isumaqarpoq.

Inatsisartuni ilaasortani 31-iusuni arfineq-pingasut kommunalbestyrelsemi aamma ilaasortaapput. Tamannalu tamat oqartussaaneranik innarliisinnaavoq – suliassanut taakkununnga partiit politikerinik amerlanerusunik peqataatitsinerusinnaanngippata. Inuiaqatigiilerinermik ilisimatooq Birger Poppel taama isumaqarpoq.

- Innuttaasut politikkimik soqutigisaqartut taaneqarluarsimasullu amerlanerit politikkikkut sulinermi peqataatinneqarnerunissaata pingaaruteqassusia tassani pineqarpoq. Tamat oqartussaaneranni ilisimasat misilittakkallu aallaavigalugit aalajangertoqartarnissaa aamma pingaaruteqarpoq, tassanilu inuit politikkimi misilittagaqareersut pineqarsinnaapput, Birger Poppel nassuiaavoq.

Taanna isumaqarpoq partiit innuttaasunik politikkikkut suliaqarnermik soqutigisaqartunik peqataatitsinerulertariaqartut, tamat oqartussaanerat taamaaliornikkut nukittorsarneqarsinnaammat.

- Tamat oqartussaanerat nukittorsarneqassappat – pingaartumik siunissaq ungasinnerusoq eqqarsaatigalugu – politikerit misilittagaqarluartut taamatullu partiivisa nukitik atorlugit innuttaasut politikkimik suliaqartut amerlisartariaqassavaat.

Inatsisartuni suliffiuvoq piffissamik atuiffiungaatsiartoq

Inatsisartuni ilaasortat piffissaq tamaat atorfeqartutut akissarsiaqartinneqarput. Inuiaqatigiilerinermilu ilisimatooq isumaqarpoq inuiaqatigiinni suliassat unammillingassallu naammattut Inatsisartut suliassarigaat. Pingaartumik siunissaq ungasinnerusoq eqqarsaatigalugu anguniagaq, namminiilivinnissaq anguneqassappat.

- Tassani oqartoqarsinnaavoq Inatsisartuni ilaasortaaneq piffissaq tamaat atorfeqarnertut sanillersuunneqarsinnaappat, taava ilaasortat assersuutigalugu kommunini politikkimik suliaqarnissamik tigusisinnaassanngikkaluartut, Birger Poppel oqarpoq.

Sermitsiaq.AG-p sapaatip akunnerata siuliani oqaluttuaraa Inatsisartuni ilaasortat arfineq-pingasut kommunalbestyrelseni aamma ilaasortaasut. Avannaata Kommuniani kommunalbestyrelsemi ilaasortat kisimik marlunnik qinigaaffeqanngillat.

LÆS OGSÅ: Inatsisartuni politikerit sisamararterutaat marlunnik qinigaaffeqarput

Marlunnik qinigaaffillit nuna tamakkerlugu politikkernermut kommuninilu politikkernermut piffissangaatsiarsuaq atortarpaat. Tamannalu innuttaasunut politikkernermik suliaqarusuttunut qunullernarsinnaasoq, isumaqarpoq. Inatsisartulli kommunalbestyrelsellu akornanni angalasaqattaarneq atorneqarpat, suliassanut piareersarnissamut piffissaq annaaneqarsinnaavoq.

- Politikerit Inatsisartunut kommunalbestyrelsemullu ataatsimiinnissanut angalasaqattaartarnerisa kingunerisinnaavaat suliassanut piareersarnissaq naammagunnaartartoq, suliassanullu itinerusumik misissuinissaminnut politikerit piffissaqarsinnaanngitsut. Politikerillu taama ulapaartigippata, inuusuttunut politikkernermik suliaqarnissamik soqutiginnittunut tamanna kukkusumik takutitsisinnaavoq. Tassa politikeriussagaanni ulloq unnuarlu sulisoqartariaqartoq.

Marlunnik qinigaaffeqarneq atorunnaarlugu partiit innuttaasunik peqataatitsinerullutik politikkikkut suliaqarusuttunik nutaanik ujartuinissamut piffissamik atuinerulertariaqartut, ilisimatooq isumaqarpoq. Taamaasiornikkut soqutiginnittut amerlanerit nuna tamakkerlugu politikkernermik kommuninilu politikkernermik suliaqarsinnaanerat anguneqassammat.

Læs hele sagen:

  1. Hver fjerde Inatsisartut-politiker har et dobbeltmandat
  2. Inatsisartuni politikerit sisamararterutaat marlunnik qinigaaffeqarput
  3. Dobbeltmandater risikerer at svække demokratiet
  4. Ingen dobbeltmandater i IA Nuuk
  5. IA Nuuk marlunnik qinigaatitaqarusunngilaq
  6. IA Nuuk marlunnik qinigaaffeqartitsinngilaq
  7. Marlunnik qinigaaffeqartut qanoq isumaqarfigaagit?
  8. Hvad mener du om dobbeltmandater?
  9. Marlunnik qinigaaffeqarneq atorunnaarli
  10. Afskaf dobbeltmandater
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER