IA Nuuk marlunnik qinigaatitaqarusunngilaq

Inuit Ataqatigiit Nuummi immikkoortortaqarfiani ilaasortat marlunnik qinigaaffeqassanatik aalajangersimapput.

Nuummi Inuit Ataqatigiit ilaasortaat politikkikkut suliaqartut, politikkimi ataasiinnarmik suliaqarput.

Tamanna kommunalbestyrelsemi sulinermi pitsaasumik malunniuteqartoq, borgmesterinngoqqammersoq isumaqarpoq.

- Piareersarnissamut piffissaq ilutsinnilu ataatsimiinnissamut aaqqiineq taanna iluaqutitaqarpoq. Nalunngilarput immitsinnut qaqugukkulluunniit saaffigeriaannaalluta. Kommunimi akisussaaffik annertoorujussuugami, politikerinullu ataasiakkaanut suliassarpassuaqareerluni, Kommuneqarfik Sermersuumi borgmesteri, Charlotte Ludvigsen (IA) oqaluttuarpoq.

Illoqarfiit pingaarnersaata kommuniani akisussaaffik annertooq

Inuit Ataqatigiit Nuummi immikkoortortaqarfiata marlunnik qinigaaffeqarnissamut periarfissaq ukiut tallimat missaanni atunngereerpaa. Tassunga pissutaavoq kommunimi illoqarfiit pingaarnersaannik illoqarfeqartumi politikerit akisussaaffimmik annertuumik tigusisariaqartarnerat.

- Piareersarnissamut piffissaq annertooq atorneqartariaqarpoq, ilutsinni ataatsimiinnerit allanillu ataatsimeeqateqarnerit aamma piffissaqarfigineqartariaqarlutik. Kommunimilu politikerit nalinginnaasumik suliassaqarnerusarput. Taamaammat aaqqiissut atorparput, IA-p Nuummi immikkoortortaqarfiani siulittaasoq, Inge Olsvig Brandt nassuiaavoq.

Akisussaaffik annertunerummat suliassallu amerlanerummata, taava politikerit nukissatik atorluartariaqarpaat. Kommunimi kommunalbestyrelsemi ilaasortat Inatsisartuni qinigaaffeqanngippata, sumiiffimmi inuiaqatigiinnut sunniuteqarneq peqataatitsinerlu annertunerulissasoq, siulittaasoq isumaqarpoq.

- Suliassanut nukissaqarneruneq piffissaqarnerunerlu iluaqutissartarivaa. Partiip iluani tamallu oqartussaanerani tamanna nukittunerulersitsivoq, Inge Olsvig Brandt oqarpoq.

Marlunnik qinigaaffeqanngitsut – peqataajuartut

Kommunalbestyrelse qaammammut ataasiarluni marloriarluniluunniit ataatsimiittarpoq. Kommunalbestyrelsemilu ilaasortat ataatsimiinnerit saniatigut, piareersarnerillu saniatigut, ulluinnarni nalinginnaasumik suliffeqarput.

Kommuneqarfik Sermersuumi borgmesterip iluaqutitut tikkuarsinnaasaata ilaat tassaavoq parteeqatit attavigineqarsinnaajuaannarnerat. IA-p kommunalbestyrelsemut ilaasortaatitaat qaqugukkulluunniit imminnut attavigisarsinnaapput – aamma Inatsisartut ataatsimiiffiisa nalaanni.

- Qaammatini marlunni pingasuniluunniit Inatsisartut ataatsimiiffiini, Inatsisartut ataatsimiiffissaminnik pingaarnersiuilertariaqartaramik. Taava kommunalbestyrelsemi ilaasortaq Inatsisartuni ilaasortaasimaguni, taava kommunalbestyrelsemi ataatsimiinnernut peqataanngitsoortarsinnaavoq, Inatsisartuni ataatsimiinnissamut pingaarnersuilluni. Taanna uagut unammillernartuutinngilarput, politikerit kommunimi suliaqartut kommunalbestyrelsennarmi ilaasortaammata. Taamaasiornikkut suliamut tunniusimaneruneq ilisimaarinninnerlu atuuppoq, Kommuneqarfik Sermersuumi borgmesteri, Charlotte Ludvigsen oqarpoq.

Inge Olsvig Brandtip erseqqissarpaa IA-p Nuummi immikkoortortaata aaqqiissut namminneerlutik aalajangersimagaat, illoqarfinnilu allani immikkoortortaqarfiit namminneerlutik aalajangissagaat ataatsimik imaluunniit marlunnik qinigaaffeqartunik ilaasortaatitaqassanerlutik.

Nutaarsiassat

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...