Inatsisartuni politikerit sisamararterutaat marlunnik qinigaaffeqarput

25 procent.

Inatsisartuni ilaasortat politikkikkut marlunnik qinigaaffeqartut procentinngorlugit taama amerlatigipput.

Marlunnik qinigaaffeqartunut ilannguttoq kingulleq tassaavoq Henrik Fleischer (S), taanna Qeqqata Kommuniani kommunalbestyrelsemi ilaasortanngorpat Partii Naleraq ilaasortaatitaqarunnaassaaq.

- Qeqqata Kommuniani kommunalbestyrelsemi ilaasortanngussallunga aalajangerpunga akisussaaffiit marluusut tamaasa ataatsikkut tigusinnaanissaannut piareersimasutut misigigama, Henrik Fleischer nassuiaavoq.

Taassuma ilanngullugu ilisimatitsissutigaa Partii Naleraq tunuliaqutaralugu politikeri misilittagaqarluartoq, Malene Ingemann, kommunalbestyrelsemi politikkimik suliaqarunnaarluni nalunaarmat aalajangernissaq ajornanngitsunnguusimasoq.

Qeqqata Kommuniani Partii Naleraq sunniutaaruppoq

Kommunini tallimaasut kommunit sisamat kommunalbestyrelseni ilaasortaatitaqarput nuna tamakkerlugu politikkimik aamma suliaqartunik.

Inatsisartuni ilaasortat marlunnik qinigaaffillit:

• Peter Olsen (IA), Kommune Qeqertalik
• Aqqa Samuelsen (IA), Kommune Qeqertalik

• Henrik Fleischer (S), Qeqqata Kommunia

• Laura Taunajik (S), Kommuneqarfik Sermersooq
• Randi Vestergaard Evaldsen (D), Kommuneqarfik Sermersooq
• Justus Hansen (D), Kommuneqarfik Sermersooq

• Anders Olsen (S), Kommune Kujalleq
• Stine Egede (IA), Kommune Kujalleq

Avannaata Kommuniani kommunalbestyrelsemi ilaasortani Inatsisartuni ilaasortaqanngilaq. Aqqalu Jerimiassen (A) Inatsisartuni ilaasortaanermini sulinngiffeqarpoq, Jens Immanuelsenilu (S) Aalisarnermut, Piniarnermut Nunalerinermullu Naalakkersuisuunermini aamma sulinngiffeqarluni.

Marluinnik teqqiaqarneq

Illoqarfiit pingaarnersaata kommuniani marlunnik qinigaaffeqarneq oqallisaangaatsiarsimavoq, pissaaneqarniuuttoqarneranillu unnerluussiniartoqartarsimalluni.

Demokraatit Kommuneqarfik Sermersuumi kommunalbestyrelsemi ilaasortaatitaat ukiuni qulini kingullerni IA-mut suleqatigiinnissamut isumaqatigiissuteqarsimapput. Tasiilamili meeqqat sumiginnarneqarsimasut pillugit suliaq oqallisigineqarnerulernerata kingorna suleqatigiinnermiit tunuarput. Tamassuma kingunerani Demokraatit ilaasortaatitaat, Justus Hansen aamma Randi Vestergaard Evaldsen, kommunep iluani politikkimik suliaqarnermi nalaanni nuna tamakkerlugu politikkimi suliassaminnik ingerlatsiniarsimasutut isornartorsiorneqarput.

Kommunep ataatsimiittarfiani ukiuni tullerni marlunni nunamut tunngasunik politikkinik eqqartuisoqangaatsiarnissaa naatsorsuutigineqarsinnaalersorlu, Asii Chemnitz Narup marlunngornermi juunip aqqarngani borgmesteritut tunuarpoq.

Siumut aqutsisuisa amerlanerussuteqartut aalajangigaat malinngikkaat

Siumut nuna tamakkerlugu ataatsimeersuarnermini 2017-imi aalajangerneqarpoq marlunnik qinigaaffeqarneq atorunnaarsinneqassasoq. Aalajangernerli taanna partiip siuttuisa atorunnaarsippaat, aalajaginnginnermi oqallisigineqarsimanerata annikippallaarsimanera tunngavilersuutigalugu.

Siumumi aqutsisut amerlanerussuteqartut aalajagingerat atorunnaarsikkusuppaat

Siumumi aqutsisut aalajangersakkani periarfissamik ammaassisumik nassaarsimapput – partiillu allattaa Mikael Petersen naapertorlugu – ilaasortat amerlanerussuteqartut aalajangigaat taamaasilluni malinneqartariaqarani. Taamaattumik maanna immikkut ittumik akuersinikkut marlunnik qinigaaffeqarneq atuutsinneqarpoq.

Marlunnik qinigaaffeqarnermut tunngatillugu apeqqut partii nuna tamakkerlugu 2020-mi ataatsimeersualerpat oqaluuserineqaqqissasoq, partiip allattaata Mikael Petersenip Sermitsiaq.AG-mut ilisimatitsissutiginikuuaa.