IA Nuuk marlunnik qinigaaffeqartitsinngilaq

Inuit Ataqatigiit Nuummi immikkoortortaqarfiani ilaasortat marlunnik qinigaaffeqarsinnaanermut periarfissamik atuinngillat.

Nuummi Inuit Ataqatigiinni ilaasortat politikkimik suliaqartut politikkikkut suliamik ataatsimik ingerlataqartuupput.

Kommunalbestyrelsemi sulinermut tamanna pitsaasumik malunniuteqartoq, borgmesterinngoqqammersoq isumaqarpoq.

- Piareersarnissamut piffissaq ilutsinnilu ataatsimiinnissat eqqarsaatigalugit tamanna iluartorujussuuvoq. Nalunngilarput qaqugukkulluunniit immitsinnut attaveqarfigisinnaalluta. Kommunimi akisussaaffik annertoorujussuugami, politikerinullu suliassat amerlallutik, Kommuneqarfik Sermersuumi borgmesteri, Charlotte Ludvigsen (IA) oqaluttuarpoq.

Illoqarfiit pingaarnersaata kommuniani akisussaaffik annertooq

Inuit Ataqatigiit Nuummi immikkoortortaqarfiata marlunnik qinigaaffeqarnissamut periarfissaq ukiut tallimat missaanni atunngereersimavaa. Taama aalajangernermut pissutaavoq kommunimi angisuumi, Kalaallit Nunaanni illoqarfiit pingaarnersaannik illoqarfeqartumi, politikerimut akisussaaffiit annertummata.

- Piareersarnissamut piffissartornarpoq, ilutsinni ataatsimiittartussaavugut aamma allat ataatsimeeqatigisartussaavagut. Kommunimilu politikerinut nalinginnaasumit suliassaqarneruvoq. Taamaattumik aalajangiineq suli atorparput, Inge Olsvig Brandt nassuiaavoq.

Akisussaaffik annertunerummat suliassallu amerlanerullutik, taava politikerit suliamut nukiminnik atuilluartariaqarput. Kommunimilu politikerit Inatsisartuni qinigaaffeqangippata, tamanna sumiiffimmi inuiaqatigiinnut sunniuteqarluarnerusoq peqataatitsinermullu nukittorsaataasoq, siulittaasoq isumaqarpoq.

- Suliamut ukkassilluarnerunissamut periarfissaqartitsimmat tamanna pitsaaqutigaa. Aamma partiip iluani tamat oqartussaaneranilu peqataatitsinermut nukittorsaataavoq, Inge Olsvig Brandt oqarpoq.

Marlunnik qinigaaffeqanngitsut – peqataajuaannartut

Kommunalbestyrelsemi ilaasortat qaammammut ataasiarlutik marloriarlutilluunniit ataatsimiittarput. Taakku saniatigut piffissaq piareersarnermut atorneqartarpoq, ilaasortallu ulluinnarni nalinginnaasumik suliffeqartarlutik.

Kommuneqarfik Sermersuumi borgmesterip iluaqutitut tikkuarsinnaasata ilaat tassaavoq parteeqatigiit imminnut qaqugukkulluunniit attaveqatigiissinnaasarnerat. IA-p kommunalbestyrelsemi ilaasortaatitai imminnut attaveqarfigiuaannarsinnaapput – aamma Inatsisartut ataatsimiiffiisa nalaanni.

- Qaammatini marlunni pingasuniluunniit Inatsisartut ataatsimiiffiini kommunalbestyrelsemi ilaasortat Inatsisartuni ilaasortaasimagunik, taava ataatsimiinnissanut pingaarnersiuisariaqalersarput. Taava Inatsisartuni ataatsimiinnerit salliunneqarlutik, kommunalbestyrelsemi ataatsimiinnernut peqataanngitsoortoqarsinnaasarpoq. Unammillernartoq taanna uagut nalaanneq ajorparput, tamatta kommunimi politikkimik suliaqaratta. Politikerit suliap ingerlaneranik ilisimasaqarluartarput, Kommuneqarfik Sermersuumi borgmesteri oqarpoq.

Inge Olsvig Brandtip erseqqissarpaa aalajangerneq IA-p Nuummi immikkoortortaqarfiata nammineq aalajangigarigaa, illoqarfinnilu allani immikkoortortaqarfiit namminneq aalajangersagaqassasut ataatsimik marlunnilluunniit qinigaaffeqartunik ilaasortaatitaqassanerlutik.

Nutaarsiassat

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...