USA kunngeqarfiup iligisaasa qaninnersaraat, kisianni...

Mette Frederiksenip ministeriunertut siullermeerluni apeqquteqaat tunngavigalugu oqallinneq manna peqataaffigivaa, naammagisimaarpaalu Kalaallit Nunaat naalagaaffiillu pissaanilissuit Issittumi pissaaneqarniunneranni isumannaallisaanermi politikkip allanngornera pillugit oqallittoqartoqarnera.

- Tamanna Kalaallit Nunaannut, Danmarkimut akunitsinnilu pissutsinut pingaaruteqarluinnarpoq.

Søren Espersenip (DF) apeqquteqaatigisimavaa, USA-p Kalaallit Nunaanni isumannaallisaanikkut suliaqarneruleriartornera naalakkersuisut qanoq isumqarfigineraat. Mette Frederiksenillu paasisinnaanerarpaa, russit Issittumi sakkussiornerannut kiisalu kiniiserit sammisaqarneruleriartornerannut USA-p qisuariarnera.

Siunnersuut

Folketingimi amerlanerussuteqartut siunnersuut manna tapersersorpaat:

Issittoq nunat pissaanilissuit unammiffiattut inissikkiartortoq Folketingi isumaqarpoq, tassungalu atatillugu oqaatigineqarluni, USA kunngeqarfiup ilisigisaasa qaninnersarigaat. USA-p Kalaallit Nunaannik soqutigisaqarnerujartornera Folketingimit ilassilluarneqarpoq, taperserlugulu Danmarkimi naalakkersuisut Naalakkersuisut peqatigalugit soqutiginninnerup Kalaallit Nunaannut inuiaqatigiinnullu kalaallinut iluaqutaanissaa sulissutigissagaat. Folketingimi paasineqarpoq Kalaallit Nunaat – Savalimmiut assigalugit – suliassaqarfinni akisussaaffigineqalersimasuni nunat tamalaat akornanni suleqatinik naapeqateqarsinnaasoq, kiisalu naalagaaffimmi oqartussaasut kunngeqarfiup nunanut allanut, sillimaniarnermut illersornissamullu politikkianik ingerlatsisinnaallutik, oqaloqatigiinnerit ingammik Kalaallit Nunaannut pingaaruteqartut Namminersorneq pillugu inatsimmi allassimasut naapertorlugit Kalaallit Nunaannik qanimut ataqatigiissaakkamik ingerlanneqassallutik. Folketingi isumaqarpoq Issittumi Atlantikullu avannaani illersornissaqarfiup suliassanik isumaginninnera nukittorsarneqartariaqartoq. Folketingi isumaqarpoq aningaasaliinissamut atatillugu misissueqqaartarnissamik aaqqissuussisoqassasoq, sillimaniarnermut aarlerinaateqarsinnaasunik misissuilluni, matumanilu nunat pingasut tamarmik ilaatinneqarnissaat sulissutigineqarluni. Folketingi isumaqarpoq naalagaaffeqatigiinni suleqatigiinneq tatiginninnermik ataqqeqatigiinnermillu tunngaveqartariaqartoq.

- Issittoq USA-p isumannaallisaanikkut politikkianut, nunanut allanut tunngasutigut politikkianut illersornissamullu politikkianut qitiulluinnartut ilagaat.

- Naalagaaffiit pissaanilissuit pissaaneqarniukkiartorneranni USA iligisatta qaninnersaat. Illersornissamut isumannaallisaanermullu politikkeqarnermi immitsinnut pisariaqartippugut.

- Taamaammat USA-p Kalaallit Nunaanni sammisaqarneruleriartornera naalakkersuisunit ilassilluarparput, aamma sunut tamanut tunngatillugu isumaqatigiittuannanngikkaluarluta, assersuutigalugu silap pissusaanut tunngatillugu.

- Soqutinnikkiartuinnarnerulli Kalaallit Nunaanut iluaqutaanissaa pingaaruteqarpoq.

Suleqatigiinneq nukittorsarneqartariaqartoq

Nalunaaquttap akunnerpaaluini oqallinnermi nipi taama ittoq uteqattaarneqarpoq. Oqaaseqartullu arlallit oqaatigaat, Issittumi pissutsit allanngornerisa malitsigisaannik Naalagaaffeqatigiinni nunat pingasut nunanut allanut tunngasutigut isumannaallisaanermullu tunngatillugu qanimut tutsuiginarnerusumillu suleqatigiinnissaat pisariaqalersimasoq.

Søren Espersenip (DF) siunnersuutigisimavaa, Naalakkersuisutigut, aammali inatsisartutigut aalajangersimanerusumik naapeqatigiittoqartoqartariaqartoq.

Inussiarnisaarnerunngitsoq

Oqaaseqartut arlallit oqaatigaat, USA inussiarnisaarluni imaluunniit Kalaallit Nunaannut ikiuunniarluni Kalaallit Nunaanni sammisaqarnerulinngitsoq, pissaaneqarnermili annertusarneqarnissaanik soqutiginnilluni taamatut iliuuseqartoq. Tassunga atatillugu mianersoqqusinerpaapput Karsten Hønge (SF), Christian Juul (EL) aamma soorunami Søren Espersen (DF).

Folketingimi amerlanerussuteqarluartut, taakkununnga ilanngullugit kalaallit folketingimi ilaasortaatitaasa USA-p qaninnertut iligineqarneranik, aammali soqutiginninnerup kalaallinut iluaqutaanissaa (faktaboks takuuk). Enhedslisten Alternativillu kisimik siunnersuummut akerliupput.