Søren E: Kalaallit Nunaata Danmark USA-luunniit toqqartariaqarpaa

Qallunaat sakkutuui imaluunniit amerikamiut sakkutuui Kalaallit Nunaanniissapput, allanik periarfissaqanngilaq. Taama isiginninneq Dansk Folkepartimit Kalaallit Nunaat pillugu oqaaseqartartup, Søren Espersenip, Folketingimi oqallisissiamik oqallittoqarnerani ullumi arlaleriarluni oqaatigaa.

- Nunarsuaq allanngorluinnarsimavoq, tassami Issittumi sakkussiussanersugut pillugu apeqqut takussaanngilarluunniit, Sermitsiaq.AG-mut oqarpoq.

USA-p Kalaallit Nunaanni suliaqarnera pillugu Søren Espersen oqallisissiatut siunnersuuteqartuuvoq.

Qallunaat politikerii arlallit, kalaallit namminiilivinnissaannut akuersaartumik nipeqartartut apeqquteqarfigineqarput namminiilivinnissamik oqalunnermit USA tinguartissimatiginersoq. SF-ip Kalaallit Nunaat pillugu oqaaseqartartua Karsten Hønge apeqquteqarfigineqartunut ilaavoq. USA-p Kalaallit Nunaannut ajunngitsumik iliorniarneranut upperinninneq 'juullip inuanut nissiaqqallu sannaviannik' upperinninnermut assersuussimavaa.

Tunngavik akerlileraa

SF-ili sinnerlugu politikerip Søren Espersenip tunngavilersuutai iserfiginngilai, oqarlunili kalaallit namminiilivinnissamik toqqaappata Danmarkip Kalaallit Nunaatalu akornanni suleqatigiinneq nutaaq takorloorlugu. Taama oqarneq oqaaseqartartunit arlalinnit taperserneqarpoq.

Søren Espersenimulli tamanna sunniuteqanngilaq, taannami qangalili Naalagaaffeqatigiinnermut akuersaarluinnartuuvoq.

- Soorlu oqallinnermi aamma arlaleriarlunga erseqqissaringa: Qallunaat sakkutuuisa sorsuutaat Kalaallit Nunaanni nakkutilliissapput, taamaanngippat USA-p. Tamanna paasissallugu pingaaruteqarpoq, aamma Naalagaaffeqatigiinneq attatinniassagutsigu. Namminiilivinnissap toqqarnera kinguneqartussaavoq, taamaattumillu aamma oqaatiginiartaqattaarpara: Danmark peqatigineqassava imaluunniit USA peqatigineqassava?

Aki-Matilda Høegh-Dam (S) taama aperineqartunut ilaavoq. Taanna akivoq nunat tamalaat akornanni suleqatigiinnerit assigiinngitsut pioreersut, taamaattumillu Søren Espersenip oqariartuutaatut kipparitsigisumik isumaqarani.