Aaja: Namminiilivinnissaq pivallaarnagu atugarissaartuunissaq oqaluuserineqarnerusariaqarpoq

Inuit Ataqatigiit namminersulivinnissamut soorunami suli isumaqataapput, Kalaallilli Nunaanni ullumikkut ajornartorsiutaasut samminerusariaqarpavut. Aaja Chemnitz Larsen Folketingimi Kalaallit Nunaat USA-lu pillugit ippassaq oqallittoqarmat taamatut oqarpoq.

- Kalaallit politikkererpassuit piffissap 90 %-ia Kalaallit Nunaata namminersulivinnissaa pillugu oqallinnermut atortarpaat, piffissallu 10 %-ia Kalaallit Nunaanni innuttasut atugarissaarnerat pillugu oqallinnermut atortarlugu. Inuit Ataqatigiit tamanna mumillugu perusupput. Kalaallit Nunaanni innuttaasut atugarissaarnerannut pitsaanerusumillu aningaasaqarnissaannut piffissap 90 %-ia atorusupparput, taamalu innuttaasut pitsaasumik tunngavissaqarluartumillu siunissaqalersillugit, Aaja oqaluttarfimmit oqarpoq.

Oqartussaaffinnik angerlaassisoqarnissaanik ujartuineq

- Suliassaqaqaaq. Kalaallit Nunaanni atugarliortoqaleriartortoq takusinnaavarput; naligiinnginnerup annertusiartornera, Kalaallit Nunaannit nutsertoqarnera isumaginninnikkullu naammaginanngitsumik sullissisoqarnera. Uffa nunani tamalaani aalisakkanut qalerualinnullu akigititat pitsaalluinnarnerat pissutigalugu Kalaallit Nunaat aatsaat taamak aningaasarissaartigisoq. Raajanummi akitsuutit ukiulunnguit ingerlaneranni 400 millioner koruuningajalluinnarnik isertissutaanerusimapput, akerlianik innuttaasut inuuniarnikkut atugaat ajorsiartuinnartut. Innuttaasut pisariaqartinneqartumik atugarissaarnikkut pitsaangorsaaffigineqarsimanngillat.

Folketingimi oqallittoqaraluartoq Naalakkersuisunut isornartorsiuivoq.

- Taamaammat Siumut Naalakkersuisunilu partiit allat, Namminersorlutik Oqartussanut sinaakkusiussat iluanni nammineq aalajangiisinnaanitsinnik nukittorsaanatik namminersulivinnissaq naalagaaffinngornissarlu pillugit oqaluleraangamik uppernarneq ajorput. Politikkikkut taamatut inissisimanitsinni uaguatsinnut uparuartuinnarsinnaavugut, Aaja isornartorsiuivoq.