Skip to main content

GA ineqarnermut politikkimut akuliuppoq

Kalaallit Nunaanni Sulisitsisut Kattuffiat isumaqarpoq ineqarnermut politikkikkut aqutsinerup iluatsinngitsoorsimaneranut alianartumik uppernarsaatissanik saqqummiussisinnaallutik 

Aaqqissuisoqarfiup oqallisissiaq una Kalaallit Nunaanni Sulisitsisut Kattuffiata pisortaanit Brian Buus Pedersenimit pissarsiaraat Naalakkersuisut ineqarneq pillugu pilersaarutaannut tunngassutilik.

Paasineqarnissaa kissaatigigatsigu tamakkiisumik saqqummiupparput:

”Qanoq iliuuseqartoqartariaqarnera kimilluunniit isumaqatiginnginneqarsinnaanngilaq. Taamaattumik naalakkersuisut ineqarnermut politikkikkut annertuumik iluarsaaqqittoqarnissaanik arlalitsigut eqqortumik imalimmik siunniussaqarput, ilaatigut inunnik isumaginninnikkut ineqarnermut tapiissuteqariaatsit saqquminerulersinneqarnissaannik, namminnerlu akiliisinnaassusilinnut tapiissutit annertuut peerneqarnissaannik imaqartumik. Ineqarnerli pillugu nassuiaammi ineqarnermut politikki ima tuaviuussaatigisunik annertutigisunillu allanngortiterinissaq siunniunneqarpoq, allaat nuna tamakkerlugu namminersortut inissialiortiterinerisa unittoorsinnaanera GA-mit ernummatigineqarsinnaalluni – ineqarnermut tunngasut oqimaaqatigiinngilluinnarlutik saamiup’tungaaniissimallutik oqimaaqatigiinngilluinnarlutik talerpiup tungaanut illuaratarsinnaapput.

Iluarsaaqqiinermik ineqarnermut akiliutit ineqarnermilu aningaasartuutit akornanni ataqatigiinnermik erseqqissumik pilersitsisumik suliaqarnissamut ukiorpassuarni politikkikkut sapiissuseqartoqarsimanngilaq. Tamanna pisortani aningaasaliissutinut ajornanngitsumik toqqorneqartarpoq, kikkulluunniit aningaasaqarnikkut piginnaasat apeqqutaatinnagit appasissumik ineqarnermut akiliuteqartitaasarlutik. Kaasarfinnut talerperlernut aningaasanik ikisisoqaraangat (ineqarnermut tapiissutinik), taakku kaasarfinnit saamerlerniittunit tiguneqaannartarnerat – tassa akileraarutitut qaffasinnerusutut – amerlanernit iluamik paasineqarsinnaasimanngilaq.

 

Akileraarutinillu aningaasat amerlanerit inissianik ingerlaavartumik aserfallatsaaliinermut pisariaqartumut atorneqartannginnerat pisumi ilungersunartuuvoq alla. Maannalu ineqarnermut politikkimi ukiorpassuarni peqqissaarussisimannginneq aningaasarpassuarnik akeqartussanngussaaq namminersorlutik oqartussat inissiaataasa ilaat 4.500-t inissianut isateriaannanngorsimasunut taartitut nutaamik sananeqartussanngorpata, inissiat 1.900-t iluarsaanneqarnissaasa saniatigut. Inissianik piviusumik amerliliisoqanngikkaluartoq koruunit milliarderpassuit atorneqarnissaat eqqartorparput, aningaasallu taakku suminngaanniit pissarsiarineqarnissaat ineqarneq pillugu nassuiaammi ajoraluartumik erseqqissumik akissutissaqartinneqanngilaq.

Robin Hoodip politikkia mumingasoq ukiorpassuit matuma siorna aallartippoq

Ineqarnermut politikkikkut alloriarneq siulleq namminersortut sanaartornerannik annertunerulersitsisussaq tassaavoq piginneqatigiilluni inissialiortiternermut inatsit 1990’ikkut aallartinneranneersoq. Pisortanit 2/3-mik tapiiffigineqarluni inissiamik pitsaasumik pissarsisoqarsinnaalerpoq. Tamanna inuppassuit aallartissutigaat, ukiullu ingerlaneranni piginneqatigiillluni inissiarpassuit sanaartorneqarsimapput, tamannali kinguneqarsimaluni innuttaasuni aningaasaqarnikkut pissarissaarnerpaat pissusiviusuni aaqqissuussinermit iluaquserneqarnerannik, pissakinnerusunimmi aningaasaliissutissat pingajorarterutaat nammineerluni akiligassaq aningaasalersorneqarsinnaanngilaq.

 

Inunnik isumaginninnermi politikkikkut equngasumik pisoqalernera tamanna aallaqqaammulli mianersoqqussutigineqarpoq, piginneqatigiillunilu inissiani paarilluagaanerusuni akiitsumininnguit akilersorneqareersimaneranni ineqarnerup akikinneruleriartornera ilutigalugu pissutsit equnganerat tamanna anneruleriartorsimavoq, tassami inissiani tamanut iluaqutaasussani ajornerujartuinnartumillu aserfallatsaaliorneqalersimasuni ineqarnermut akiliutit qaffakkiartulersimavoq – naak ullumikkut aningaasartuutit matussusernissaannut suli appasippallaaraluartut.

Namminerisamik ineqalernissamut akiliuteqarnerunissamut aningaasaatillit amerlanerulaartunik aallerfiginiarlulgit 10-40-50-imik aaqqissuussineq (ullumikkut 20-20-60) atuutilersinneqarpoq, taannalu nunarsuarmi namminersortut inissialiortiternerannut aningaasalersueriaatsit nunarsuarmi maannamut pitsaanerpaartarigunarpaat. Allaammi piginneqatigiilluni inissialiortiternermut aaqqissuussinermik iluaqutiginnereersimasumut neqeroorutigineqalerpoq – kakkaammi pissutsit ingerlalluarmata, maannami ineqarnermut tunngasut saamimmut illuarluinnarput, tassami sanaartorneq namminersortut aningaasalersuinerannit ingerlanneqartussanngorpoq. Ineqarnerup qanoq akeqarnera kimilluunniit ilisimaneeruppoq – maanna inissiat attartortittakkat aserfallassimanerat annertusiartulerpoq, iluarsaassinissamillu kinguaattoorutit iluarsiiviginissaat piinnarnagu aammali nutaanik sanaartornikkut initaarnissamut utaqqisut ikilisarniarlugit, pisortani aningaasaliissutissat tatineqaraluttuinnalerlutik.

 

Kigaallassapiluulerpugut – nakkaattoornissamut aarlerinartorsiulerluta

GA’p isumaa malillugu ”Robin Hoodip politikkianik mumingasumik” atorunnaarsitsinissaq pisariaqarluinnarpoq. Kisianni inissianik niuerutiginninnermi aaqqissuussaaneq – tamatumanilu nunap immikkoortuini allaanerussuterpassuit – annerusumik eqqarsaatiginagit ineqarnermut politikkikkut pissutsit tassanngaannaq mumisikkaanni ajornartorsiutinik ilungersunartunik pilersoqarsinnaavoq.

Taama pisoqassaaq Kalaallit Nunaanni inissianik niuerfik – immaqa Nuuk minillugu – niuerutiginninnermi atugassarititaasut nalinginnaasut malillugit ingerlanngimmat. Tamanna ineqarnermut politikkikkut suliniutit naalakkersuisunit siunneqartut aqqutigalugit arlalinnik kinguneqarsinnaavoq:

- pisortanit aningaasalersueriaatsit (iluanaarnartut) ataatsikkut atorunnaarsinneqarpata tamatumalu peqatigisaanik ernianit ilanngaataasartut annikillilerneqarpata Nuup avataani namminersortut aningaasalersugaannik nutaanik inissialiortoqarunnaassaaq, immaqalu allaat Nuummi inissialiortoqarunnaassallunik. Tamanna nassuerutigineqaannarsinnaavoq. Nuup avataani illoqarfinni soorlu Qaqortumi, Sisimiuni Ilulissanilu namminersortut illuinut pituttuisoqalereerpoq, illut tunineqartussanngoraangata nammineerluni nutaaliornermi aningaasartuutaasimasut amerlaqisunit matussuserneqarsinnaasanngimmata – illoqarfiit mikinerit pissutsit suli ilungersunarneruffigisaat eqqaanngikkaluarlugilluunniit.

 

Taamaattumik pisortat inissialiortiternerannik pilersaarutaasumik annikillilerinissap namminersortut inissialiortiternerannit matussusiivigineqarsinnaanissaa upperissallugu iluaqutaanavianngilaq – aamma naak inuttut akileraarutit appartinneqarnissaat siunniunneqaraluartoq. Namminersortut inissialiortiternerisa pisortat inissialiortiterneranni annikillilerinermut matussusiinissaannik ineqarneq pillugu nassuiammi naatsorsuutiginninneq GA’mit upperineqanngilaq.

- Pisortani inissialiortiternerup ikinnerusunut namminneerlutik akiliisinnaassuseqanngitsunut killilerneqariartornerata peqatigisaanik inissialiortiternerup namminersortunit aningaasaliiffigineqartup pisariaqartinneqarnera alliartupiluulissaaq, nunattalu karsiata Nuup avataani, tamaani illuliornissamut taarsigassarsiniartarfinnit taarsigassarsisoqarsinnaanngimmat, illuliornianut taarsigassarsiniartarfittut atuutilersinneqarsinnaanera GA’mit ernumanartorujussuartut isumaqarfigineqarpoq. Pisortanut akiitsunik akiliisitsiniartarnermi misilittagarineqartut pitsaanngitsuunerat eqqarsaatigalugu illuliortiternermut taarsigassarsiarititat angisuut qanoq ingerlassannginnerpat? Pisortani inissialiortiternerup pisariaqartitsinerpaginnarnut tunngatinneqartussanngorlugu annikillilerneqarneratigut namminersortut illuliornissaannut pisortat taarsigassarsisitsisarnikkut aaqqiissuteqarnissaannik tatisineq annertoorujussuanngussaaq.

- Inissianik niuerutiginnittarnermi niuerfinni aaqqissuussinerit nalinginnaasut atuutinnginnerisa kingunerannik sulisinnaasut nuna tamakkerlugu nuttarsinnaanerata maannakkorpiaq pisariaqartinneqartup tammakarnissaa kikkulluunniillu nuunnissamut akissaqannginnerat pissutigalugu suliffeqarnerup unittoornissaa ernummatigineqarsinnaavoq. Siornatigut akikitsunik taarsigassarsisarsimasunut maannalu tunisissagunik akissaqarnerulersimasunut sanilliullugu sanaartornissamut tamakkiisumik akiliisissanngortunut niuerfinni aarlernartorsiorneq aamma annerulersimassaaq.

- Suliffimmut atatillugu initaarnissamut periarfissat ajorseriarpata sulisussanik kajungilersitsinissamut aalajangiusimanninnissamullu periarfissat annikillissapput. Imaanngitsoq utaqqiisaasumik ineqarnermi akiliisoqartalissammat, tamannami pissusissamisoorluinnartuusariaqarmat, imaluunniit suliffimmut atatillugu inigisami ineqarnermut akiliutit naleqquttuussammata. Sulisussarsiarineqartartut ilaasa ikittuararsuit illunik niuerfimmi nalorninartulimmi tikisitarpassuarnullu aallaqqaammut ukiorpassuarni Kalaallit Nunaanni suliffeqarnermut pituttugaanissamik eqqarsaateqanngitsunut nalorninaatilimmi illumik pisinissamut piviusumik periarfissaqarlutillu piumassuseqarnissaat isiginngitsuusaaginnarneqarsinnaanngilaq.

- Suliffimmut atatillugu inissiani ineqarnermut akiliutinik qaffaanerit annertuut akissarsiat annertuumik qaffanneqarnissaannik piumasaqaateqarfiunnginnissaat ilimagissallugu aamma uppiavallaarneruvoq. Ineqarnermut akileraartarnermullu politikki ataatsimoortillugu eqqarsaatigineqaraluartoq inuttut akileraarutinik assersuutigalugu 1%-imik appaanerup akileraarutinit allanit il.il. tamakkiisumik aningaasalersorneqarnissaa siunertaavoq. Akileraarutitigut oqilisaassinerit ilaat innuttaasut kaasarfiinit tassa aaneqassapput ineqarnermullu akiliutit qaffasinnerusut akilerneqarnissaannut atorneqarsinnaanatik.

 

Ineqarneq pillugu nassuiaat eqqorluaanermik amigaateqarpoq

Ataatsikkut allanngortinneqartussat annertullutillu amerlaqaat, taakkunanngalu tamanit naatsorsuutigineqarluni allanngortiterineq tamarmi imminut aningaasalersussaq, ullumikkut attartortuusut ilarpassuisa piginnittunngornissamut pissutissaqalernissaat ilimagineqarmat.

Illunik niuerutiginninnermi niuernikkut aningaasalersuinikkullu pissutsit ilungersunartuunerat pissutigalugu naatsorsuutiginninnerup tamatuma attanneqarsinnaanissaa GA’p ilimaginngilaa. Taamaattumik ineqarnermut politikkikkut akuliunnissamik siunnerfeqarnerup pissutsinik mumisitsilluinnarnissaa nutaanillu sanaartortoqanngitsoorneranik inissianillu pilersuinermi amigartoorutit amerlaneruliinnarnerannik kinguneqarnissaanut aarlerinaat annertoorujussuuvoq. Sanaartornermi suliffissaqartitsineq tassanngalu akileraarutitigut pisortanut iluanaarutit qanoq pissappat? Aningaasallu inissianik iluarsaassinissaannarmut isaterinissaannarmullu pisariaqartinneqartumut suminngaanniissappat?

Taamaattumik GA isumaqarpoq, ineqarneq pillugu nassuiaat kingunissai naammattumik naatsorsorneqanngitsunik sunniutissanik annertuallaanik siunniussaqartoq, Robin Hoodip politikkiata mumingasup eqqunneqarnerani pisutorluinnaq. Ineqarneq pillugu nassuiaat aalajangiinernik aalajangersimalluinnartunik tuaviuussaasunillu, niuerfimmit tamarmiusumit naleqqussariartuaarfiginissaanut periarfissaqarfigineqarsimanngitsunik, kinguneqartinnagu nalilersueqqissaarnerni eqqorluaanerunissaq qarasarinnerunissarlu pisariaqarput.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER