isumaqatigiissut annaaneqartoq
Naalakkersuisut: Isumaqatigiissut ‘maangaannartinngilarput’
Naalakkersuisut Inuit Ataqatigiit Naalakkersuisunut Pituffik pillugu uparuaanerannut akissuteqarput. - IA-p naliliinera inerniliineralu neqerooruteqartitsinerup qanorpiaq ingerlasimaneranik tunngaveqanngilluinnarpoq, Naalakkersuisut taama akissuteqarput
Inuit Ataqatigiit Naalakkersuisunut ilaasortanik Inatsisartut Inatsisartut nunanut allanut sillimaniarnermullu ataatsimiititaliaani ataatsimeeqateqareerlutik piumasaraat arlaannaannulluunniit attuumassuteqanngitsunit 2013-ip qiteqqunneraniilli Naalakkersuisut kiffartuussinissamut isumaqatigiissut annaaneqartoq pillugu qanoq akuusimatiginerat suliallu qanoq ingerlasimanera misissorneqartariaqartoq.
- IA-p tamanut maannakkut nalunaaruteqarluni naliliinera inerniliineralu neqerooruteqartitsinerup oktobarip 31-anni USA-p Thule Air Basemi kiffartuussinissamik isumaqatigiissutip Exelis Servicesimut ingerlatseqatigiiffimmut tamakkiisumik amerikamiut ingerlatseqatigiiffiannit pigineqartumut tunniunneqarnissaanik nalunaaruteqarneratigut naasup qanorpiaq ingerlasimaneranik tunngaveqanngilluinnarmata, Naalakkersuisut taama allapput.
- Naalakkersuisut Inatsisartuni illuatungiliuttut qanittumik suleqatigineqarnissaat pingaartitaraat - aamma suliami tassani - kisianni illuatungiliuttut suliassaminnut inerisimanissaat aamma pisariaqarpoq, Naalakkersuisut siulittaasuat Kim Kielsen oqarpoq.
Atuaruk: Pituffik pillugu suliami Naalakkersuisut misissorneqarnissaat IA-mit piumasarineqarpoq
Naalakkersuisut Inuit Ataqatigiit uparuaanerannut atatillugu ilanngullugu allapput danskit kalaallillu naalakkersuisuisa, kiisalu suliffeqarfiit allat USA-p aalajangiineranik naammagittaalliuuteqartut akornanni ataatsimut paaseqatigiittoqartoq. Tassa USA-p suliariumannittussarsiuussinermi inerniliinera suliariumannittussarsiuussisarnermut malittarisassanut naapertuutinngitsoq.
- Tamanna amerikamiut naammagittaalliuuteqartarfianni maannakkut suliarineqarpoq. Naammagittaalliuuteqartarfik amerikamiut sakkutuuisa suliariumannittussarsiuussisarfiattulli amerikami oqartussaaffiuvoq, tusagassiuutinut nalunaarumminni Naalakkersuisut taama allapput.
- Taamaammat Naalakkersuisut kiffartuussinissamik isumaqatigiissummik maangaannartitsisimaneraaneq piviusorsiortuunngilaq aamma Kalaallit Nunaata Danmark qanittumik suleqatigalugu suliami tassani USA-mut Kalaallit Nunaata soqutigisai suliariniarlugit aqqusaarsimasaanut tunngatillugu ingerlasimanermut tunngatillugu eqqarsaatigilluagaanani, Naalakkersuisut allapput.
Atuaruk: Olsvig: Pituffik pillugu IA-mit uku pingaartinneqarput
Atuaruk: Vittus: USA-p isumaqatigiissut tamakkiisumik naammassinngilaa
Pituffimmi kiffartuussinissamut isumaqatigiissut annaaneqartoq pillugu Folketingetimi tuaviuussamik januarip 21-ani oqalittoqassaaq.
Pituffimmi kiffartuussinissamut isumaqatigiissut amerikamiut suliffeqarfiutaannut Exelis Services/Vectrusimut oktobarimiit tunniunneqasssaq. Manna tikillugu Greenland Contractors Pituffimmi kiffartuussisuusimagaluarpoq.
Pituffik pillugu allaaserisat allat uani atuakkit