Pituffik

Olsvig: Pituffik pillugu IA-mit uku pingaartinneqarput

- Naalakkersuisut pisoq pillugu oqaaseqarumanngissusaat tupigaarput, Inuit Ataqatigiit siulittaasuat Pituffimmi kiffartuussinissamut isumaqatigiissutip annaaneqarsimanera pillugu oqarpoq

Inuit Ataqatigiinni siulittaasoq Sara Olsvig

Inatsisartut nunanut allanut sillimaniarnermullu ataatsimiititaliaata Pituffimmi kiffartuussinissamik isumaqartigiissutip annaaneqarsimanera ilungersunartorujussuartut isigineqarnera allaaserineqartareerpoq.

Inuit Ataqatigiinnit suliaq ilungersunartutut aamma isigineqarpoq. Ataatsimiititaliap naalakkersuisunik isumasioqateqannginnerani ima oqarpoq:

- Pituffimmi kiffartuussinissamut isumaqatigiissutip annaaneqarsimanera pillugu Naalakkersuisunik isumasioqatigiinnissami suut anguneqassasut neriuutigaajuk?

- Naalakkersuisut peqatigalugit pisoq pillugu toqqaannartumik oqaloqatigiittoqarnissaa neriuutigaarput. Pituffimmi kiffartuussinissamik isumaqatigiissutip annaaneqarnera ilungersunartuuvoq. Kiffartuussinissamut isumaqatigiissutip aalajangiiffigineqannginnerani aalajangiiffigineqareerneranilu Naalakkersuisut qanoq sulisimanersut paaserusupparput, Sara Olsvig akissuteqarpoq.

- Naalakkersuisut tungaannit una pillugu oqaaseqarsimannginnerat tupigusuutigaarput. Aatsaammi tusagassiortunik katersortitsinermi januaarip arfineq aappaani una pillugu oqaaseqarfigineqarpoq. Pisoq pillugu Inatsisartunut isumartik oqaaseqarfiginngeriarlugu tusagassiortunut katersortitsinermi isumartik aatsaat annippaat. Siunissami aamma qanoq iliuuseqartoqarniarnersoq tassani oqaatigineqarpoq, oqarpoq. Kalaallit Nunaanni tamanut una suliaasoq aamma oqaatigaa.

Suliaq tamanut eqquisoq
Naalakkersuisut siulittaasuat Kim Kielsen Siumut parteeqataalu Vittus Qujaukitsoq isumasioqatigineqassapput, tassani Inuit Ataqatigiit naalakkersuisunut piumasaqaateqassaaq, aamma isornartunik apeqquteqassaaq.

- Isumasioqatigiinneq decembarimi pissasoq Inuit Ataqatigiinnit piumasaqaatigereerparput. Ataatsimiititaliami amerlanerussuteqalernerput nuannaarutigaara taamaasilluni isumasioqatigiittoqassaluni, isumasioqatigiinnissaq sioqqullugu Sara Olsvig oqarpoq. Isumasioqatigiinneq nalunaaqutaq 14.30 aallartissaaq.

Kalaallit Nunaata Pituffimmi kiffartuussinissamut isumaqatigiissutip annaareeraa piumasaqaateqarpoq taartisiaqartinneqartariaqarluni, tamanna Naalakkersuisut siulittaasuata Kim Kielsenip Helle Thorning-Schmidtilu ataatsimut tusagassiortunik katersortitsinermini januaarip arfineq aappaani oqarpoq

Powered by Labrador CMS