Pituffik
Ataatsimiititaliami siulittaasoq: Pituffik pillugu suliaq ilungersunartorujussuartut isigaarput
Inatsisartut nunanut allanut sillimaniarnermullu ataatsimiititaliaata Pituffimmi kiffartuussinissaq pillugu isumaqatigiissutip annaaneqarnera ilungersunartutut isigigaa ataatsimiititaliami siulittaasup Justus Hansenip oqaatigaa. Naalakkersuisut marluk tamanna pillugu isumasioqatigineqassapput
Pituffimmi kiffartuussinissamik isumaqatigiissutip annaaneqarnera pillugu ullumi sisamanngornermi sammineqassaaq.
Inatsisartut nunanut allanut sillimaniarnermullu ataatsimiititaliaa peqatigalugu isumasioqatigiittoqassaaq.
- Greenland Contractorsip Pituffimmi kiffartuussinissamik isumaqatigiissummik annaasaqarnera pillugu suliaq nunanut allanut sillimaniarnermullu ataatsimiititaliap ilungersunartutut, allaallu ilungersunartorujussuartut, isigaa, ataatsimiititaliami siulittaasoq Demokraatinit Justus Hansen allappoq.
Tamaattumik ataatsimiititaliaq sapaatit akunnerini kingullerni Naalakkersuisunut arlalinnik apeqquteqarpoq.
Apeqquteqarnikkut ilaatigut paasiniarneqarpoq amerikamiut oqartussaasuisa kiffartuussinissaq pillugu suliffeqarfimmik, Danmarkimi adresseqarnerinnani aqqutigalugu naalagaaffeqatigiinnermut attuumassuteqartumik, isumaqatigiissuteqarnerat naalagaaffeqatigiinnerup USA-llu akornanni isumaqatigiissutinut atuuttunut naapertuunnersoq.
Pisup Greenland Contractorsip kiffartuussinissaq pillugu isumaqatigiissummik annaasaqarneranik kinguneqartup tamarmiusup qulaajarneqarnissaanut ataatsimiititaliaq aamma apeqquteqarpoq, tassunga ilanngullugu pisumi tassani Naalakkersuisoq qanoq annertutigisumik akuutinneqarsimanersut aammalu taamaassimappat pisup ingerlarngani Naalakkersuisut Kalaallit Nunaata soqutigisaanik qanoq isumaginnissimanersut.
- Kiisalu pisumi Naalakkersuisut Naalagaaffeqatigiillu Kalaallit Nunaata soqutigisaanik qanoq pitsaanerpaamik isumaginnissaanersut paasissallugu ataatsimiititaliamit soorunami soqutigineqarpoq, nunanut allanut sillimaniarnermullu ataatsimiititaliaata siulittaasua ilisimatitsivoq.
Isumasioqatigiinnissaq ullumi
Tassaammat Naalakkersuisut siulittaasuat Siumumit Kim Kielsen aamma parteeqataa nunanut allanut naalakkersuisoq Vittus Qujaukitsoq ullumi sisamanngornermi isornartorsiornartunik apersuinissamut ataatsimiititaliaq aggersaavoq.
- Apersuinissamut aggersaanermi siunertaavoq suliap ineriartorneranik ataatsimiititaliap ilisimatinneqarnissaa, tamatumalu peqatigisaanik paasissutissat ataatsimiititaliap maannamut Naalakkersuisunit pissarsiarisimasaasa itisilertinneqarnissaannut ataatsimiititaliap periarfissinneqarnissaa, Justus Hansen nassuiaavoq.
Folketingimi ataatsimiinnissat
Pituffik pillugu Folketingimi aamma ataatsimiittoqassaaq januaarip 21-ani. Inatsisartut nunanut allanut sillimaniarnermullu ataatsimiititaliaa aamma Folketingip Kalaallit Nunaat pillugu ataatsimiititaliaa ataatsimeeqatigiissapput taanna pillugu.
Inatsisartut nunanut allanut sillimaniarnermullu ataatsimiititaliaani ilaasortat Steen Lynge Atassummit aamma Inuit Ataqatigiinnit Sara Olsvig ataatsimiigiartinneqassapput.