Pituffik
Pituffik pillugu suliami Naalakkersuisut misissorneqarnissaat IA-mit piumasarineqarpoq
Inuit Ataqatigiit piumasaraat arlaannaannulluunniit attuumassuteqanngitsunit 2013-ip qiteqqunneraniilli Naalakkersuisut qanoq akuusimatiginerat suliallu qanoq ingerlasimanera misissorneqartariaqartoq
- Naalakkersuisut politikkikkut pisoq suusupagivallaarsimavaat.
Nunanut allanut sillimaniarnermullu ataatsimiititaliami Naalakkersuisut Pituffimmi kiffartuussinermut isumaqatigiissutip annaaneqarsimanera pillugu isumasioqatigereerlugit Inuit Ataqatigiit isornartorsiuipput.
- Taamatut suusupaginnitsigisimaneq assut eqqarsarnarpoq, ingammik nunatta aningaasaqarneranut suliaq taamak pingaaruteqartigisoq. Naalakkersuisullu siuliisa nunanut allanut tunngassuteqartunut piffissangaatsiarsuarmik atuisarnerat eqqarsaatigalugu, illuatungiliuttunit oqaatigineqarpoq.
Taamaattumik Inuit Ataqatigiinnit piumasarineqarpoq arlaannaannulluunniit attuumassuteqanngitsut 2013-ip qiteqqunneraniilli Naalakkersuisut qanoq akuusimatiginerat suliallu qanoq ingerlasimanera misissorneqartariaqartoq.
- Misissuinerup siunertarissavaa politikkikkut qanoq qaffasitsigisukkut Naalakkersuisut pisoq qanoq malinnaaffigitigisimaneraat qanorlu isumagineqarsimanersoq. Ilanngullugu qulaajartikkusupparput piffissaagallartillugu Inatsiartut ilisimatinneqartarsimanersut, ingammik kingunissai pillugit, Inuit Ataqatigiinnit oqaatigineqarpoq. Inatsisartunut qinersisoqarnerata pissutigisaanik una suliarineqartoq IA-mit ilisimaarineqarpoq, tamannali aporfiusinnaanngitsoq aamma oqaatigalugu.
Tikkuartuinnginnissaq
- Tikkuartuiniarnermik siunertaqassanngilaq, kisianni aaqqissuussaanitta qaqugukkulluunniit tamatigullu nunatta soqutigisai aallunneqartuaannartussanngorlugit ilusilersorsimanissaa qulakkeerniarlugu – apeqqutaatinnagu kikkut naalakkersuisutut inissisimanersut kiisalu qineqqusaartoqarnersoq.
Naalakkersuisut siulittaasuat Kim Kielsen Siumut, parteeqataalu nunamut namminermut naalakkersuisoq Vittus Qujaukitsoq isumasioqatigineqarput sisamanngormat.
Pituffimmi kiffartuussinissamik isumaqatigiissutip annaaneqarnera pillugu Folketingimi januaarip 21-ani aamma ataatsimiissutigineqassaaq.
Ameriarmiut suliffeqarfiat Vectrus Pituffimmi kiffartuussinissamik isumaqatigiissut tigussavaa oktobarimi. Greenland Contractorsip Pituffimmi sulineq ingerlatarigaluarpaa.