Vittus: USA-p isumaqatigiissut tamakkiisumik naammassinngilaa

Greenland Contractorsip Pituffimmi kiffartuussinissamut isumaqatigiissumik annaasaqarnerata kingorna Inuit Ataqatigiit Naalakkersuisunut paragraf 37 naapertorlugu arlalinnik decembarimi apeqquteqaateqarput.

Inuit Ataqatigiit siulittaasuata Sara Olsvigip partii sinnerlugu ilaatigut apeqquteqaatigaa Naalakkersuisut isumaqarnersut ingerlatsiviup kiffartuussinissaq pillugu isumaqatigiissummik pinnattup kalaallinit danskinilluunniit pineqarani amerikkamiut pinnannerat pissusissamisoornersoq.

- Amerikamiut tungaanniit ilisimatitsissutigineqarpoq Pituffimmi sakkutooqarfimmi piffissamut 2015 - 2022 kiffartuussinissamut isumaqatigiissut nutaaq suliffeqarfimmut Exelis Servicesimut tunniunneqartoq. Taamaattoq peqatigisaanik ilisimaneqarpoq suliffeqarfiit neqeroortitsinermut akuusut arlallit tamatuma kingorna Amerikami oqartussaasunut aalajangiinermut akerliliissuteqarsimasut, maannakkut suliassaq suliarineqarluni, taamaattumik tamanna Amerikami oqartussaasut aamma ingerlatitseqatigiiffik akornanni maanna suliassaalluni, inuussutissarsiornermut, suliffeqarnermut, niuernermut nunanullu allanut tunngasunut naalakkersuisoq, Vittus Qujaukitsoq Sara Olsvigimut taama akissuteqarpoq.

Kisianni taassuma naqissuserpaa Naalakkersuisut isumaqartut Pituffimmi kiffartuussinissamut isumaqatigiissutitp amerikkamiut suliffeqarfiannut pinera pissusissamisuunngitsoq.

- Naalakkersuisut isumaqanngillat kiffartuunneqarnissamut isumaqatigiissutip ingerlatseqatigiiffiup immikkoortortaanut nunanit allaneersumut tunniunnerani, sapinngisamik annertunerpaamik suliffeqarfiit danskinit/kalaallinit pigineqartut sulitinneqarnissaat pillugu isumaqatigiissut tamakkiisumik USA-p naammassisimagaa, Qujaukitsoq allappoq.

Ingerlatseqatigiiffiit kiffartuussinissamut isumaqatigiissummik pinnanngitsoortut maalaaruteqarlutik USA-mi immikkut ittumut maalaaruteqartarfimmut tunniussaqarnikuupput.

- Taamaattumik danskit naalakkersuisui imaluunniit Naalakkersuisut suliani pissutsiniluunniit suliareqqitassanngorlugit naammagittaalliuutinik tunniussiffiusimasuni, Amerikami oqartussaasut tungaanniit inaarutaasumik isummertoqariinngippat, akuliussinnaanngillat, Vittus Qujaukitsoq nassuiaavoq.