Ministeri islandimiu: Ataatsimoorluta angusaqarluarsinnaavugut

Island, Savalimmiut nunarpullu ataatsimoorlutik angusaqarluarnissaminnut periarfissaqarput suleqatigiikkunik, taama islandernimi ministerit ilaat isumaqarpoq.

- Aalisarnermik inuussutissarsiuteqarnerup iluani suleqatigiinnerput annertusitikkutsigu, soorlu aalisakkanik tunisassiat piseqqusaarutiginerini, taakkualu takornariaqarnerup iluani suliaqarnermut kapitartuukkutsigit, taava angusaqarluarnissatsinnut periarfissaqarluarpugut, taama Sigurður Ingi Jóhannsson, Islandimi aalisarnermut nunalerinermullu naalakkersuisoq Sermitsiaq.AG-mut oqarpoq.

Atuaruk: Lars-Emil Johansen Issittup imartaani qillerinernut naaggaarpoq

Assit takukkit: Siunnersuisoqatigiit ataatsimiinnerat Aasianni aallartinneqarpoq

Taannami isumaqarpoq Islandip takornariaqarnermi aalisarnermilu inuussutissarsiornermi siuariaateqarnera inuussutissarsiutit taakkua marluk suleqatigiisinneqarnerata kinguneranik pisoq.

- Timmisartut Europamiit USA-miillu Islandimukartartut tamaasa atorluartarpagut. Taakkuami Islandimiit ingerlaqqittarput aalisakkanik tunisassianik usillutik, soorlu aamma imaatigut assartuinermi aaqqissuussilluarsimasugut, Sigurður Ingi Jóhannsson oqaluttuarpoq.

Arfininngornermi isumasioqatigiittoqarnerani politikerit, ilisimatuut inuussutissarsiornermillu ingerlataqartut saqqummiussipput. Taakkua ilagaat økonomi islandermiu Heiðar Már Guðjónsson.

Heiðar Már Guðjónssonip ilaatigut oqaluttuaraa islandermiut avammut niuernertik siuariartissimagaat nunap assartuussisarnermut nammineerluni aaqqissuussinerata kingorna.

Atuaruk: Siunnersuisooqatigiit: Issittumi periarfissat atorluartariaqarpavut

Atuaruk: Nunat avannarliit killiit Siunnersuisoqatigiivisa Issittoq samminiarnerulerpaat

Timmisartortitsileqatigiiffiillu Islandimut Islandimiillu angalasartut avammut niuernermut atorluarnerisigut, Savalimmiut aamma nunarput atuilluarsinnaasoq Islandermiut aalisarnermut nunalerinermullu ministeriat isumaqarpoq.

- Isumaqarpunga Islandi igalaatut ittoq, nunani avannarlerni killerniittuni Savalimmiuni ingammillu Kalaallit Nunaannit atorluarneqarsinnaasoq, Sigurður Ingi Jóhannsson oqarpoq.

Aallartitat sapaammi isumasioqatigiillutik nunani avannarlerni killerni suli annerusumik suleqatigiittoqarsinnaaneranut periarfissat aporfiusinnaasullu oqaluuserissavaat.

- Periarfissaqarluarpugut siuariaateqarnissatsinnut, kisianni nunani killerni avannarlerni naalakkersuisuusut ataatsimoorussillutik suleqatigiikkusussanersut apeqqutaavoq, Sigurður Ingi Jóhannsson ilaatigut isumaqartoq Islandi, Savalimmiut aamma nunarput sutigut tamatigut suleqatigiissinnaasut oqarput.

Assit: Nunat pingasut - Issittumi immikkoortortaqarfik ataaseq

Nittartakkami uani nutaarsiassanik Nunat avannarliit killiit Siunnersuisoqatigiit naapeqatigiinneraneersunik ingerlaavartumik ikkussuisoqassaaq