suleqatigiinneq
Assit: Nunat pingasut - Issittumi immikkoortortaqarfik ataaseq
Aalisakkat, takornariaqarneq niuernerlu eqqarsaatigalugit Kalaallit Nunaat, Island aamma Savalimmiut ataqatigiinnerusariaqarput, Nunat avannarliit killiit Siunnersuisoqatigiivisa siulittaasuat Bill Justinussen oqarpoq
Nunat avannarliit killiit Siunnersuisoqatigiivisa siulittaasuata tulliata Lars-Emil Johansenip Siumumeersup, Aasianni ataatsimiinnissaq sioqqullugu Nuummi ilasseqatigiinneq ammarpaa. Niuerneq suleqatigiinnerlu ataatsimeeqagiinnermi eqqartorneqassapput.
- Aalisarnikkut arfaniarnikkut pinngortitamullu ataqqinnittuunerput assigeequtigaarput. Nunanut allanut saqqumilaarnerusariaqarpugut. EU-mi sukaterisoqartarnera unammillernartuusarpoq. Aalisarnikkut immitsinnut 'tillinniaqattaarunnaarluta' aalisarnikkut suleqatigiinnerulertariaqarpugut. Pisassiissutinik isumaqatiginninniartoqartalertariaqarpoq. Tamanna siunissamut pitsaanerullunilu angusaqarfiunarnerussaaq, siulittaasoq Bill Justinussen oqarpoq.
Issittumi angalasinnaaneq
Takornarialerineq periarfissarpassuaqarpoq. Issittumi angalasinnaanerup ussassaarutigineqalernissaa suliniutigineqartariaqartoq nunat isumaqarput. Savalimmiuni Kalaallit Nunaannilu angalasarnerit akikinnerulernissaat siunnerfigineqarpoq.
- Timmisartuussinerit aningaasarsiutigineqassanngillat. Takornarissat pisiarisartagaat aningaasarsiutigineqarnerusariaqarput. Nerisassat, takusassat pialullu. Angalaniarnerup akisunerujussuata nassataanik takornarissanik tikittoqarpiarneq ajorpoq. Timmisartuussisarnerit akikinnerujussuusariaqarput siunissami, Bill Justinussen oqarpoq.
Niuerneq
Inuussutissarsiornermut, Suliffeqarnermut Niuernermut Nunanullu Allanut Naalakkersuisoq, Vittus Qujaukitsoq Siumut, Aasianni qanoq pitsaanerusumik niueqatigiittoqarsinnaaneranik siunnersuummik saqqummiussiniarlutik nalunaarutigaa. Assigiinngitsunik siunnersuuteqartoqassaaq.
- Piviusorsiussaagut. Oqaluinnarnata iliuuseqassaagut. Issittumi suleriaasissanik siunnersuutit Aasianni ataatsimiinnermi saqqummiunneqassapput, Nunat avannarliit killiit Siunnersuisoqatigiivisa allaffissornermi pisortaat, Inga Dora G. Markussen oqarpoq.
Nunat Avannarliit Siunnersuisooqatigiivisa Aasianni ataatsimiinnissaat pillugu annertunerusumik aviisimi Sermitsia-mi atuarsinnaavutit. Aviisi uani pisiariuk
Assit ataani takukkit