Nunat avannarliit killiit Siunnersuisoqatigiivisa Issittoq samminiarnerulerpaat

Nunat avannarliit killiit Siunnersuisoqatigiivisa saavalimmiuni inatsisartunut ilaasortaq Bill Justinussen siulittaasutut nutaatut toqqarpaat.

TDaanna Nunat avannarliit killit Siunnersuisoqatigiivisa 30-issaannik ukiumoortumik ataatsimiinneranni, Islandimi Vestmannaøerne-mi ingerlanneqartumi, toqqarneqaqqammerpoq.

Taamatut tusagassiorfinnut nalunaarutikkut paasissutissiivoq Nunat avannarliit killiit Siunnersuisoqatigiivi.

Bill Justinussenip Nunat avannarliit killiit Siunnersuisoqatigiivini siulittaasutut kingoraarpaa Unnur Brá Konradsonsdótttir, Islandip inatsisartuini Lagtingimi ilaasortaq Islandillu aallartitaasa siulittaasuat.

Siulittaasunngornerminut atatillugu oqalugiarnermini Bill Justinussenip pingaartumik sammisat marluk, ukioq manna siunnersuisoqatigiit ukiumoortumik ataatsimiinnerminni oqaluuserisimasaat, sammivai.

– Ukiumoortumik ataatsimeeqataasut oqaaseqareerput, sulilissaagullu. Nunani avannarlerni Killerni ataatsimut issittumut periuseqarnissatsinnik aalajangerenerput pifissami pingaarutilimmi pivoq, nunarsuup immikkoortuata inissisimaffitta sammineqaleruttornerani. Siunnersuisoqatigiinni nunat pingasut ilaasortat nunanut allanut ministeriisa septembarip aallaqqaataani ataatsimiinnerisa uppernarsaaffigaatigut ataatsimut periussamik nassaarniarnissaq pisariaqartoq, suliallu ingerlateqqinnissaanut naalakkersuisuvut pilersorsinnaavagut oqaloqatigisarlugillu, tusagassiorfinnut nalunaarut maillugu Bill Justinussen oqarpoq.

Taamaattumik aappaagu ataattsimiinnissami sammineqassaaq ´Issittumi Nunat Avannarliit Killiit - takorluukkamit piviusunngortitsinermut´.

Suleqatigiiffissatut periarfissat
Ukiumoortumik ataatsimiinnermi nunani killerni avannarlerni politikerit nalunaarusiaq ´Savalimmiut, Kalaallit Nunaata Islandillu akornanni Nunat avannarliit Killiit issittumi suleqatigiinnerat´ oqaluuseraat. Nalunaarusiami ilaatigut aalisarnermi, niuernermi aningaasaliissuteqartarnermi, akitsuuteqanngitsumik niueqatigiinnermi, assartuinermi attaveqarnermilu aammalu upalungaarsimanermi, suleqatigiiffissatut periarfissat eqqartorneqarput.

Nunat avannarliit killiit Præsidium-ianni maannakkumiit ilaasortaalerput siulittaasoq Bill Justinussen, Savalimmiut Inatsisartuanni ilaasortaq, naalakkersuisut siulittaasuata tullia Lars-Emil Johansen, Inatsisartut siulittaasuat, aamma Unnur Brá Konradsdóttir, Islandip inatsiartuini Altingimi ilaasortaq.

Nunat Avannarliit Killiit Siunnersuisoqatigiivi Savalimmiuni Lagtingip, Nunatsinni Inatsisartut aamma Islandimi Altingip suleqatigiiffittut attaveqaatigaat.