Siunnersuisooqatigiit
Lars-Emil Johansen Issittup imartaani qillerinernut naaggaarpoq
Inatsisartut siulittaasuat aamma Nunat Avannarliit Killiit Siunnersuisooqatigiivisa siulittaasuata tullia, Siumumeersoq Lars-Emil Johansen, Issittup imartaani qillerilluni uuliasiornermut naaggaarpoq
Nunat Avannarliit Killiit Siunnersuisooqatigiivisa siulittaasuata tullia, Siumumeersoq Lars-Emil Johansen, isumaqarpoq imartatta immamilu pisuussutitta paarilluarnissaat pingaaruteqarluinnartoq.
Lars-Emil Johansenimi isumaqarpoq kinguaatta atugassaat immeraassutigisarigut Issittup imartaani qillerilluni uuliasiortoqaleraangat.
- Imartarpummi inuussutigaarput. Pisuussutigut uumassusillit inuussutigaagut. Taamaammat isumaqarpunga pingaaruteqarluinnartoq kinguaassatta siunissaata immeraassutiginnginnissaa, taakkuami aamma raajanik, qaleralinnik, arfernik, puisinik aamma qalerualinnik inuussuteqartussaammata, Lars-Emil Johansen Sermitsiaq.AG-mut oqarpoq.
Assit takukkit: Siunnersuisoqatigiit ataatsimiinnerat Aasianni aallartinneqarpoq
Atuaruk: Siunnersuisooqatigiit: Issittumi periarfissat atorluartariaqarpavut
Taamaammat Lars-Emil Johansen isumaqarpoq maani nunatsinni aamma nunani avannarlerni killerni isumaliutigineqartariaqartoq ataatsimoorluni imaani uuliasiorluni qillerisoqartarneranut naaggaartoqassannginnersoq.
- Issittummi imartaa mingutsitsinermut sunnertisiasorujussuuvoq. Uumasoqatigiillu mingutsitsinermik innarlerneqarpata piffissaq sivisuujussuaq atorlugu innarliineq taanna qaangerniarneqassaaq, Lars-Emil Johansen Sermitsiaq.AG-mut oqarpoq.
Atuaruk: Nunat avannarliit killiit Siunnersuisoqatigiivisa Issittoq samminiarnerulerpaat
Assit: Nunat pingasut - Issittumi immikkoortortaqarfik ataaseq
Taarsiullugu Lars-Emil Johansen isumaqarpoq nunami aatsitassarfioqarnerit aalluttariaqarigut, aammalu nunatsinni 2 millioner kvadratkilometerisut isorartutigisumi nunami qillerilluta uuliasiortariaqartugut.
- Uuliasiorluni qillerinerit akerlerinngilakka, taakkua nunami ingerlanniarlik, kiisalu aatsitassanik nunami piaanerit nunamilu uuliasiornerit ingerlannissaat samminiartigit, Lars-Emil Johansen Sermitsiaq.AG-mut oqarpoq.
Nittartakkami uani nutaarsiassanik Nunat avannarliit killiit Siunnersuisoqatigiit naapeqatigiinneraneersunik ingerlaavartumik ikkussuisoqassaaq