ilisarititsineq
Andap atorfeqarnera assiliartalersorlugu
Maanna Demokraatit siulittaasorisimasariligaannit Sermitsiaq ilisarititsivoq
Anda Uldum '79-ernisaavoq Qeqertarsuarmilu inunngorluni. Taamaalilluni ukiumi namminersornerulernerup eqqunneqarnerani inunngorpoq.
Ilanngullugu qinikkatut sulinini 2009-imi qinersisoqarnerani Demokraatit tunuliaqutaralugit qinigassanngortikkami aallartippaa - ukioq taanna Nunarput namminersulerpoq.
Atuaruk: Namminersornerusut qitornaat namminersornermik pilersitsiniarput
Perorsaasoq
Anda Uldum perorsaasutut ilinniarsimasuuvoq, qinikkatulli sulinini sioqqullugu nipilersortartutut ilisimaneqarneruvoq, ilaatigut rockertartuni DDR-mi guitarertuulluni, qatanngutini marluk nipilersoqatigisarlugit, ilaatigullu meeqqanut nuuteeraq, Angakkuakkatut, nuannarineqarluartoq erinarsortuuffigalugu.
Taasisut 79-t
2009-mi qinersinermi Anda Uldumi Inatsisartunut ilaasortanngorpoq 79-init taaneqarluni.
2013-imi qinersisoqarnerani 184-nit taaneqarpoq, Anda Uldumilu aamma Demokraatit ukiuni sisamani Inuit Ataqatigiinnik naalakkersuisooqateqareerlutik tunuariarmata ilaasortaajunnaarpoq.
Ukiumili tassani Kommuneqarfik Sermersuumi kommunalbestyrelsimut ilaasortanngorpoq, tassanilu Demokraatit Inuit Ataqatigiinnik suleqateqalerput.
Siulittaasoq nutaaq
Anda Uldum marsimi 2014-mi partiimi siulittaasutut qinerneqarpoq, Jens B. Frederiksen aatsitassarsiornermik ingerlatsivimmi True North Gemsimi sulilerniarluni politikkimit tunuarmat.
2014-imilu qinersisoqarnerani Anda Uldum taaneqarnerpaat tallimaattut inissippoq, 1.004-nit taaneqarluni.
Siulittaasoq naalakkersuisuni Siumumik aamma Atassummik 2014-imi novembarimi suleqateqalernermi kingorna ilaasortanngorpoq, aningaasanut aatsitassanullu akisussaasunngorluni, kiisalu Naalakkersuisut siulittaasuanut tullersortinngorluni. Tassani urani pillugu apeqqutip partiit ataatsimuulersippai.
Assit takukkit: Naalakkersuisunngortussat ilisaritinneqarneri
Qinikkatulli sulineq politikerimut sunniuteqangaatsiarpoq. Novembarip aappaani 2015-imi Anda Uldum stressernini pissutigalugu sulinngiffeqarluni nalunaarpoq. Januaarillu aqqaneq-aappaani politikkimit tunuarluni politikeri nalunaarpoq.
Allaaserisap ataani assit takukkit