Anda Uldum politikkimit tunuarpoq

Demokraatit nutaamik siulittaasortaassapput.

Partiip siulittaasuata Anda Uldumip, oktoberimi stressernini pissutigalugu sulinngiffeqalersup politikkimit tunuarniarluni aalajangernerata kingorna tamanna pivoq.

Demokraatit tusagassiuutinut nalunaarummi taama nalunaarput.

Atuaruk: Uldum stresserluni suliunnaarallarpoq

Danmarkimut nuulersut
Taassuma piffissami tulliuttumi sulerissanerluni aalajangiutereerpaa.

Anda Uldumip nulia Danmarkimi ilinniarluni aallartippoq ulloq 1. februar, Anda Uldumilllu kissaatigaa nuliani ilagissallugu.

- Ilaquttakka tamatigut salliujuaannartussaapput. Nuliara ukiorpaalussuit imminut tunulliunnikuuvoq uanga politikkikkut sulininni tapersersorumallunga. Maannakkullu uanga utertitsisussanngorpunga taamaattumik Danmarkimut nooqatiginissaanut aalajangernissara oqittunnguusimavoq, tusagassiuutinut nalunaarut naapertorlugu taama oqarpoq.

Anda Uldumi 2014-imili Demokraatini siulittaasuuvoq. 2014-imi ukiakkut qinersinermi partii angusarissaarluni qineqqusaarmat siuttuuvoq, Inatsisartunilu partiip ilaasortaatitai marloriaatinngortillugit aammalu tamatuma kingorna maannakkut Naalakkersuisusunut partii ilaalerpoq.

Immikkut ittumik ataatsimeersuarneq
Anda Uldumip aalajangernerata kinguneranik Demokraatit nutaamik siulittaasortaartussanngorput nutaanillu siulersuisuunertaarluni.

Tamanna pissaaq februaarimi Nuummi partii immikkut ittumik nuna tamakkerlugu ataatsimiilerpat. Politikkimut akisussaalluni siulittaasumut tullersorti Randi Vestergaard Evaldsen Anda Uldum napparsimalermalli partiimut siulittaasuugallartutut inissippoq taamatullu ingerlaannassalluni immikkut ittumik nuna tamakkerlugu ataatsimiinnissap tungaanut.