Jens B. politikkimi akuujunnaassaaq

Demokraatit siulittaasuat Jens B. Frederiksen pingasunngornermi tusagassiortunut katersortitsinermini oqaatigaa Inatsisartuni ilaasortaajunnaassalluni kiisalu Demokraatini siulittaasuujunnaassalluni. Demokraatit nuna tamakkerlugu immikkut ittumik martsip 15-anni ataatsimeersuartinneqarnissaat siunersuutigaa, tassani Jens B. Frederiksen siulittaasutut qinigassanngorteqqissanani nalunaaruteqarniarpoq, kiisalu ullumi tassani Inatsisartuni ilaasortaajunnaassalluni nalunaaruteqarluni.

- Isumaqarpunga sivisuallaamik politikkeritut ingerlasoqartassanngitsoq taamaattumik aamma aalajangereernikuuvunga, tulliani Inatsisartunut qaquguussanersoq qinersilerutta sassaqqinniarnanga. Maannakkut isornartorsiuineq pisoq tunngavigalugu takorloorsinnaanngilara Kalaallit Nunaata aningaasarsiornera aatsitassarsiornerlu pillugit politikkeqqissallunga, aatsitassarsiorneq eqqartuleraangakku pasillertuarneqartalissagama. Taamaattumik partiima tatiginassusaa pillugu aalajangerpunga tunuarniarlunga, Jens B. Frederiksen oqarpoq.

Michael Rosing Inatsisartuniilissaaq
Nangillunilu:

- Inuttulli isumaqarpunga aatsitassarsiortut tamarmik pinerluttuunerarlugit peqquserluttuunerarlugillu politikerit tamangajammik oqalunnerat tulluanngilluinnartoq. Tamanna Kalaallit Nunaannut aningaasaleerusussuseqarnermut ulorianarpoq. Eqqaamassavarput nammineq tikilluaqqunikuugatsigit misissueqqaarnissaannullu akuerinikuullutigit aamma nuannaarutigaarput, nunatsinni inuutissarsiortut iluaquserlugit, maannamut 100 milliuunilikkaanik atuisimammata. Tamatuma saniatigut amerlanerpaat kissaatigaat nunaqavissut sapinngisamik amerlanerpaat aatsitassarsiornerup iluani sulilissasut. Taamaakkaluartorli tamakku oqarfigineqarput politikkimi oqallinnermutt akuussanngitsut, attuumassuteqarpallaaramik. Tamanna demokratimut ajornartorsiutaavoq. Tunngaviusumik inatsit naapertorlugu kikkulluunniit qinigassanngortissinnaatitaapput, ataasikkaat qinersinernut sassaqqusaajunnaarsimanngippata.

Jens B. Frederiksenip neriuutigaa Demokraatit qinersinissami tulliuttumi siuariarumaartut, inuussutissarsiornermik tunngasunik kiisalu inuiaqatigiinnut sullissisumik nunatsinni atorfissaqartitsisoqarnera pissutigalugu.

Politikkimut tunngasunik akuujunnaarniarluni oqarpoq, Demokraatinili ilaasortaaginnarniarluni oqaatigaa.

Michael Rosing Jens B. Frederiksen taarsiullugu Inatsisartuni ilaasortaalissaaq.