Nuuk
Assit: Anda Uldum siulittaasunngorpoq
Anda Uldum kisiartaalluni siulittaasussatut sassarpoq. Siulittaasumulli tullertut sassartut marluullutik
Tulluusimaarlunilu nuannaartoq Anda Uldum, pingasunngornermi unnukkut Demokraatinut siulittaasunngorpoq.
- Partiimut siuttussatut toqqarassinga nuannaarutigeqaara tulluusimaarlungalu. Suliarli kisima kivissinnaanngilara. Tamassi pisariaqartippassi. Politikkitta nunarput tamakkerlugu siaruarternissaanut tamatta ullumimiit sulissuteqarnissarput pisariaqartippara. Siulersuisuunerit eqeersimaartuussapput, partiip iluani inuiaqatigiinnilu politikkikkut oqallinnermut akuliuttarlutik. Nunap immikkoortuini immikkoortortaqarfiit eqeersimaartuussapput, najukkami politikkikkut oqaluuserisassanngortitsisinnaasut nunatsinnilu kommunini tamani najukkami pissutsinut politikkitsinnik sammisaqalersitsisinnaassuseqartut. Aammattaaq inuusuttunut immikkoortortaqarfik eqeersimaartoq kissaatigaara, inuiaqatigiinni oqallinneq panerpallaaleraangat tinnersaasinnaasoq, Anda Uldum siulittaasunngornermini oqalugiarami oqarpoq.
Siulittaasunngortut aamma nuannaarutigai siulersuisuunernut ilannguttut nutaat, isumalluarnartoqartikkamigit.
- Isumalluarnerujussuarmik immeqqavunga siulersuisuunerit qissiminneritigut. Inuit pikkorissorsuupput tamarmik immikkut ilisimasallik, assigiinngitsunik suliffeqarfinnik tunuliaqutillik, Anda Uldum oqarpoq. Aamma nuannaarutigaa maanna siulersuisuunerni nunatta annerpaartaa sinnerlugu peqataasoqalermat.
Siulittaasunngortup suliassaa siulleq tassaalerpoq Demokraatit politikkiat siammarternissaa.
- Pingaarnerpaajuvoq politikkitta nuna tamakkerlugu siammarternissa, siulittaasunngorlaaq oqarpoq.
Demokraatit ataatsimeersuarneranni partiip isigineqarnera allanngortariaqarnera eqqartorneqarpoq, tamannalu Anda Uldumip isumaqatigaa.
- Uparuarneqartarpugut Nuuk kisiat sullittaripput, taamatullu isigineqannginnissarput sulissutigissavarput, Anda Uldum nassuiaavoq.
Siulittaasup tullissaatut sassartut marluk
Aviaaja Karlshøj Poulsen Nuummeersoq kiisalu René Caspersen Sisimiuneersoq siulittaasumut tullissatut sassarput. Aviaaja Karlshøj Poulsenilu amerlanernit qinerneqarluni siulittaasup tulliatut inissippoq.
Demokraatini siulittaasuujunnaatoq Jens B. Frederiksen Inatsisartuni politikkimilu akuujunnaarpoq, inuussutissarsiornermut suliaqartussanngorami. Aatsitassarsioqatigiiffimmi True North Gems Greenland A/S-imi Executive Vice Presidentitut atorfeqassalluni.
Jens B. Frederiksen taarserlugu Michael Rosing Inatsisartuni ilaasortanngussaaq.