Oqaluttuarisaanermi naalakkersuisooqatigiit siammasinnerpaat Kielsenip pilerseriaraluarpai

Naalakkersuisut siulittaasuata Kim Kielsenip oqaluttuarisaanermi aatsaat taama siammasitsigisumik naalakkersuisooqatigiinnik Inatsisartuni illuatungeriit tamakkerlugit pilersitseriaraluarpoq.

Partiit naalakkersuisooqataasut Demokraatit aamma Atassut peqataarusunngimmata, tamanna iluatsinngilaq - taamaalilluni partiit taakku marluk illuatungiliuttunngorput, KNR ilisimatitsivoq.

Atuaruk: D aamma A anereerlutik: Siumut ilumini ajornartorsiorluni akerleriiffiuvoq

Tamangajammik
Suliniut iluatsissimasuuppat, Siumut, Inuit Ataqatigiit, Demokraatit, Atassut aamma Partii Naleraq naalakkersuisooqatigiilissagaluarput, taamaalillutik Inatsisartut ilaasortaannit 31-iusunit 30-t tunuliaqutaassagaluarput, attaviitsoq Per Rosing-Petersen kisimi avataaniilerluni.

Oqaluttuarisaanermi naalakkersuisooqatigiit aatsaat taama siammasitsigissagaluarput - partiillu tungaatigut novembarimi 2005-imi qinersinerup kingorna Siumut, Inuit Ataqatigiit aamma Atassut suleqatigiinnerannit siammasinnerussagaluarluni, taamani Demokraatit kisimik partiini illuatungiliuttuupput.

Atuaruk: Naalakkersuisooqatigiilersut namminersulernissaq naligiinnerulernissarlu pingaartippaat

Tunngavissaqanngitsoq
Siammasissumik naalakkersuisooqatigiinnermik pilersitsineq allaavoq, politikkikkullu isumaqatigiinneq allaavoq, tamannalu pisinnaasimanngilaq, Demokraatineersoq Justus Hansen KNR-imut naqissusiivoq.

Partiit talerperliit aamma Partii Naleqqap akornanni isumaqatigiinngissutit annertuallaartut Demokraatit isumaqarput. Naalakkersuisooqatigisimasanullu Inuit Ataqatigiinnut aamma taamaappoq.

Atuaruk: Naalakkersuisooqatigiilersut uranimut aalajangiinissaq kinguartippaat

- Isumarput allanngortinngilarput, taakkua uagulluunniit suleqatigissavaat, Justus Hansen KNR-imut oqarpoq. Kim Kielsenillu kingorna naalakkersuisooqatititk taarsissallugit aalajangerput.

Atuaruk: Angallannermut tunngatillugu ajorseriarnerit peerneqartut