Angallanneq
Angallannermut tunngatillugu ajorseriarnerit peerneqartut
Naalakkersuisooqatigiilersut nutaat kiffartuussinermut isumaqatigiissutini nutaani isornartorsiutigineqartut naaperiarniarpaat
Naalakkersuisooqatigiilersut Siumut, Inuit Ataqatigiit aamma Partii Naleraq, angallassinermut kiffartuussinermut isumaqatigiissutinut akerleriissutaasunut tunngatillugu nutaamik iliuuseqassapput.
Angallannermut isumaqatigiissutit nutaat, ilaasut, nassiussat allakkallu isorliunerusunut angallanneqarnissaannik qulakkeerisussat ukioq nutaamit atuutilissapput.
Isornartorsiuineq sakkortooq
Tunngaviusumik isumaqaitigiissut ukiaq saqqummiunneqarpoq, taannalu arlalinnik pissuteqartumik sakkortuumik isornartorsiorneqarpoq. Isumaqatigiissutit nutaat ilaatigut umiatsianik, qulimiguulinnik angallassinernik ilalerlugu pingaartippaat, maanna qulimiguulimmik angallanneq pingaarnerugaluarpoq.
Ilaasullu ilaatigut sila ajortillugu kinguaattoornermi unnuinermut nerisaqarnermullu maanna akiliunneqartarunnaartussaagaluarput.
Atuaruk: Ilaasut timmisartorlutillu umiarsuartassapput
Kommunit akerliusut
Kommunit kattuiffiat Kanukoka isornartorsiuisunut ilaavoq, taamatullu inuussutissarsiortut aamma innuttaasut ingammik Kujataaneersut sakkortuumik isumaqatigiissummut isornartorsiuipput.
Atuaruk: Kiffartuussinermut isumaqatigiissutit nuna tamakkerlugu akerliuffigineqalersut
Ajorseriartoqassanngitsoq
- Atsiortut isumaqatigiissutigaat innuttaasunik angallannerup tungaatigut kiffartuussinissamik isumaqatigiissusiortoqarnerani innttaasut atugaannik ajorseriartitsisoqassanngitsoq. Taamaattumik kommunit naammagisinnaasaannik isumaqatigiissusiortoqassaaq, naalakkersuisooqatigiinnissamut isumaqatigiissummi tamanna allaqqavoq.
Attaveqarnermut naalakkersuisunngortoq, Martha Lund Olsen, nutaamik isumaqatigiissusiortitsissaaq.
Atuaruk: Air Greenland: Sulisunik 37-nik soraarsitsivugut