Naalakkersuisut
Naalakkersuisooqatigiilersut uranimut aalajangiinissaq kinguartippaat
Partiit maanna isumaqatigiinnginnertik isumaqatigiissutigigallarpaat
Naalakkersuisooqatigiilersut Siumut, Inuit Ataqatigiit aamma Partii Naleraq, partiit isumaqatigiinngissutaasa annerpaartaannut tunngatillugu - uranisiornissamut aalajangernissaq kinguartippaat.
Isumaqatigiinnginneq
Naalakkersuisooqatigiinnissamut isumaqatigiissutip 'Naligiinneq, Toqqissisimaneq, Ineriartorneq' qulequtaralugu partiit pingasut oqaatigaat, Siumup uranisiornissaq attatiinnarniarpaa, partiillu marluk Kalaallit Nunaata naaggaarnera attatiinnassavaat.
Isumaqatigiinngissutaasorlu taanna illuatungeriit siunissami aaqqiiviginiarsarissavaat - Inatsisartunullu saqqummiutissallugu.
Qinnuteqaatit nutaat
- Naalakkersuisooqatigiit isumaqatigiissutigaat apeqqut qiqinneqassasoq, tamanna siumut isigaluni ilaatigut uranimik akulinnik aammalu saffiugassanik qinngornilinnik piiaasoqarnissaa siunertaralugu qinnuteqaatit nutaat pisariaqartilerpassuk, isumaqatigiissummi tamanna allaqqavoq.
- Naalakkersuisooqatigiit taamatut isumaqatigiissuteqarput, Kalaallit Nunaanni pissutsit amerlasoorpassuit peqatigiilluni aammalu suleqatigiilluni aatsaat qaangerneqarsinnaammata, aammalu illuatungeriit kissatiginngimmassuk apeqqutit ataasiakkaat suleqatigiinnissamut aporfiunissaat, naalakkersuisooqatigiilersut taama isumaqatigiipput.
Naalakkersuisooqatigiinnissamut isumaqatigiissut oqaatsini marlunni saqqummiunneqartoq, allaaserisap talerpiani aaneqarsinnaavoq.
Atuaruk: Demokraatit aninerup kingorna: Suna tamaat akuersaarsinnaanngilarput