ilinniartitaaneq
Nivi Olsen: Ilinniartitsisunngorniarneq pitsanngorsaavigineqartariaqarpoq
Ilinniarfissuaq nunani allani ilisimatusarfimmik suleqateqalersuuppat pitsanngoriaateqarsinnaasoq Demokraatinit Nivi Olsen isumaqarpoq
Meeqqat atuarfiat pitsanngoriassapput ilinniartitsisut aamma pitsanngortariaqarput.
Ilinniartitaanermut naalakkersuisuunikoq Nivi Olsen (D) oqarpoq.
- Ilinniartitsisunngorniartarnerup sakkortunerusup, pitsaanerusup imaqarnerusullu qularnaassavaa pitsaassuseq meeqqat atuarfianni ujartorneqartoq, tusagassiuutinut nalunaarummi allappoq.
Atuaruk: D: Meeqqat atuarfiat sallinngortinneqartariaqarpoq
Pisinnaasat pitsaanerusut
Piumasaqaatit annertuumik qaffanneqaraluarpata, ilinniartitsisunngorniarnissaq ajornarnerulersillugu Demokraatit isumaat naapertorlugu ajunngilaq.
- Tamatuma kingunerilluarsinnaavaa ikinnerit naammassisarnissaat, peqataanilli qularnaarneqassaaq, naammassillutik sulilersussat ilisimasaqarluarnissaat, Nivi Olsen oqarpoq. Taassuma Ilinniakkat bachelorinngorniarfittut kandidatimut nangeqqinnissamut periarfissaqartillugu qaffanneqassasoq takorusuppaa- soorlu Finlandimi taamaattoq.
Atuaruk: IMAK: Ilinniarfissuup pitsaassusaa qaffasinnerusariaqarpoq
Pitsaassuseq suliallu qaffasinnerit
Ilinniarfissuaq nunani allani ilisimatusarfimmik pikkorissorsuarnik ilisimasakkaanillu ilinniartitsisussanik naammassiffiusarnini pillugu ataqqineqartumik suleqateqalersuuppat pitsaassagaluartoq Demokraatit isumaqarput.
- Uani siunnersuuteqassanngilagut ilisimatusarfik sorliussanersoq aamma nunami sumiissanersoq. Apeqqutaajumaarpoq misissuinissaq. Qularinngilarpulli taamatut suleqateqarneq Ilinniarfissuarmut isumassarsititsilluarsinnaajumaartoq ullumimullu naleqqiullugu pikkorinnerusunik ilinniartoqalertarnissaq kinguneqassasoq, Nivi Olsen oqarpoq.
Aamma atuakkit:
Ilinniarfissuaq angusinngitsoorpoq
Ilinniarfissuarmi pisortaq taarserneqarpoq