Naalakkersuisoqarfimmi pisortap akulerussimanini illersoraa

Akileraartarnermut Aqutsisoqarfik soraarnerussutisiaqalernissamut ileqqaagaqartussaatitaanermut suliami allaffissornikkut malittarisassanik malinninnersoq pillugu eqqartuussissuserisunik DLA Piperimeersunik Inuussutissarsiornermut Naalakkersuisoqarfik misissuititsivoq.

Tamanna inissimaniilluinnarpoq, naalakkersuisoqarfimmi aaqqissuussinermi akisussaaqataavoq, Inuussutissarsiornermut Naalakkersuisoqarfimmi pisortaq, Jørn Skov Nielsenip naliliinini Sermitsiaq.AG-mut ilisimatitsissutigaa.

Naalakkersuisoqarfiit eqqartuussissuserisutigut akunnerminni aaqqiagiinngissuteqartut

Mailikkut akissuteqarnermini Jørn Skov Nielsen erseqqissaavoq naalakkersuisoqarfiup danskit oqartussaasui suliami attavigisarsimagai. Attaveqarnermut pissutaavoq inatsisissatut allannguutissatut siunnersuutip saqqummiunneqannginnerani, soraarnerussutisiaqartitsivik SISA soraarnerussutisiaqalernissamut ileqqaarisussaatitaanermi suliamik tigummisussatut Aningaasaqarnermut Nakkutilliisoqarfiup itigartissimammagu:

Toqqaannartumik akisussaaqataasoq

- Aningaasaqarnermut Nakkutilliisoqarfiup aalajangiinerata kingunerisaanik, Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfiup siunnersuutigaa aningaasalersuinermi inatsisip § 304-p Kalaallit Nunaannut tunngasortaa allanngortinneqassasoq, taamaasiornikkut suliariumannittussarsiuussineq aqqutigalugu SISA allaffissornermik tigusisinnaasunngortillugu, Jørn Skov Nielsen allappoq nangillunilu:

- Taamaattumik Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoq (Jess Svane, aaqq.) soraarnerussutisiaqalernissamut ileqqaarisussaatitaanerup torersumik inatsisinillu tunngavissaqartumik naammassineqarnissaanut toqqaannartumik akisussaaqataaffeqarpoq.

Svane siunersuinissaq sioqqutitsiarlugu tupatsitsisoq

Naalakkersuisoq Jess Svanep eqqartuussissuserisunik DLA Piperimeersuik Akileraartarnermut Aqutsisoqarfiup allaffissornikkut sulinermi malittarisassanik malinninnerannik, aqutsisoqarfimmik Aningaasanullu Naalakkersuisoqarfimmik ilisimatitseqqaarnani misissuititsisimanini oqaaseqarfigissanagu ilisimatitsereerpoq.

Innuttaasunit saaffigineqartut

Jørn Skov Nielsen Ilisimatitsivoq aaqqissuussineq pillugu naalakkersuisoq Jess Svane innuttaasunit saaffigineqarsimasoq, taamaattumillu naalakkersuisoq suliamik misissuilersimasoq.

DLA Piper misissuinermini inerniliussivoq Akileraartarnermut Aqutsisoqarfik sulinermini inatsisinik unioqqutitsisimasoq. Inerniliussat Aningaasaqarnermut Naalakkersuisoqarfimmut saqqummiunneqarmata, aalajangerneqarpoq Naalagaaffiup eqqartuussissuserisuata Akileraartarnermut Aqutsisoqarfiup suliami iliuuserisimasai misissussagai.

Professori: Svanep peqateqarani sulinera akuersaarneqarsinnaanngilaq

Naalagaaffiup eqqartuussissuserisua allatorluinnaq inerniliivoq. Akileraartarnermut Aqutsisoqarfik inatsisinik malinnilluni sulivoq, DLA Piperilu misissuinermini naammanngitsunik tunngavilersuuteqarluni suliaqarsimavoq.

Qulaangassat tamarmik misissorneqarput

Naalakkersuisoqarfimmi pisortaq Jørn Skov Nielsen allappoq, nalinginnaalluinnartoq suliassaqarfik aqutsisunit marlunnit avinneqarsimatillugu, malittarisassat inatsisitigut assigiinngitsunik isumaqartinneqartarnerat:

- Sulilluarnertut nalilerneqartariaqarpoq, qulaajangassat tamaasa misissormagit. Taamaasiornikkut innuttaasunut inuussutissarsiortunullu pitsaanerpaamik tunngaveqarluni aqutsineq ingerlanneqarnissaa qulakkeerpaa, Jørn Skov Nielsen allappoq.

Inatsisilerituutut professori Sten Bønsing Sermitsiaq.AG-mut naliliivoq, inuussutissarsiornermut naalakkersuisoqarfik minnerpaamik aningaasaqarnermut naalakkersuisoqarfimmik ilisimatitsisussaagaluartoq, Akileraartarnermut Aqutsisoqarfiup sulineranik misissuinerminik. Taamaasiornikkut akileraartartut akileraarutaat asuliinnaq atornissaat pinngitsoortinneqarsinnaammat.