Professori: Svanep peqateqarani sulinera akuersaarneqarsinnaanngilaq
Inuussutissarsiornermut Naalakkersuisoqarfiup akileraartarnermut aqutsisoqarfiup suliaanik misissuisimanera, suliamilu aqutsisoqarfimmik ilisimatitseqqaarsimannginnera akuerineqarsinnaanngitsoq, inatsisilerituutut professori oqarpoq.
Inuussutissarsiornermut naalakkersuisoqqarfik, naalakkersuisoq Jess Svane siuttoralugu soraarnerussutisiaqalernissamut pinngitsoorani ileqqaarisalernissaq pillugu allaffissornikkut malittarisassanik atuineq pillugu eqqartuussissuserisumik ukioq manna misissuisitsilerpoq.
Taama iliornermi Akileraartarnermut aqutsisoqarfik aamma Aningaasaqarnermut naalakkersuisoqarfik ilisimatinneqanngilaq, tamannalu nalinginnaasuunanilu akuerineqarsinnaanngilaq.
Aalborgip Universitetiani Inatsisilerinermik institutimi professori, Sten Bønsing taama naliliivoq:
- Oqartussat allat akisusaaffimminnik naammassinninniarnerat pillugu ilisimatitsinani misissuititsineq akuerineqarsinnaanngilluinnarpoq. Taamaaliornermi oqartussat akunnerminni assortuuttutut isikkoqarsinnaavoq, naak tamanna suliassarinngikkaluaraat, Sten Bønsing oqarpoq.
Allagaatinik takunnissinnaalernermi paasinarsivoq Jess Svanep eqqartuussissuserisut suliffeqarfiat DLA Piper piumaffigisimagaa Akileraartarnermut aqutsisoqarfiup soraarnerussutisiaqalernissamut ileqqaarisarnermi allaffissornikkut sulineranik misissueqqullugu.
Ataqatigiissaarinissamik piumasaqarneq
Pappiaqqat Sermitsiaq.AG-p allagaatinik takunnissinnaalernermini pissarsiarisimasai naapertorlugit, DLA Piperip Aningaasaqarnermut naalakkersuisoqarfik Akileraartarnermullu Aqutsisoqarfik ilisimateqqaarnagit misissuiffigisimavai, taamaaliornerlu ingerlatsinermi tutsuiginassuseqarnissamut ileqqoreqqusanik malinnginngitsoq, Sten Bønsing oqarpoq:
- Tunngavimmigut oqartussaaffiit suliassatik kisiisa suliarissavaat. Allat suliassaqarfiinut akulerutissanngillat. Oqarusuppunga minnerpaamik oqartussaq misissuiffigineqarneq ajorpoq, misissuiffigineqarnissamik ilisimateqqaartinnagu.
Bønsing naapertorlugu oqartussat akornanni suliniutit ataqatigiissaarneqarnissaat piumasaqaataavoq. Taamaasiornikkut akileraartartut akiliutaasa asuliinnarnissaat pinngitsoortinneqarsinnaammat.
Misissuititseqqinneq isumatusaarneruvoq
Eqqartuussissuserisut suliffeqarfiat DLA Piper naliliinermini erseqqissaavoq Akileraartarnermut aqutsisoqarfik suliami arlalitsigut inatsisit unioqqutillugit sulisimasoq. Taama inerniliisoqarmat Aningaasaqarnermut Naalakkersuisoqarfik misissuititseqqippoq.
Soraarnerussutisiaqalernissamut pinngitsoorani ileqqaarisussaatitaanermi, suliami Akileraartarnermut aqutsisoqarfik inatsisinik atuuttunik unioqqutitsilluni sulisimanersoq pillugu, Naalagaaffiup eqqartuussissuserisua misissuisussatut naalakkersuisoqarfimmit suliakkerneqarpoq. Naalagaaffiup eqqartuussissuserisua DLA Piperip inerniliussaata illuatungerluinnaanik inerniliussaqarpoq.
Naalakkersuisoqarfiup qisuariarnera inissaminiittoq, Sten Bønsing naliliivoq:
- Unnerluussinerit taama sakkortutigimmata misissuititsinissamik aallartitsineq isumatusaarneruvoq, oqarpoq.