Svane siunersuinissaq sioqqutitsiarlugu tupatsitsisoq

Aningaasaqarnermut Naalakkersuisoq, Vittus Qujaukitsoq, Namminersornerup oqaluttuarisaanerani ammasumik siunersiuinerit siullersaannut peqataajartornissani akunnialuinnarnik sioqqullugu allakkiamik 31-nik quppernilimmik eqqartuussissuserisut suliffeqarfianni DLA Piperimeersumik saqqummiussivigineqarpoq.

Allakkiaq Akileraartarnermut Aqutsisoqarfiup, Vittus Qujaukitsup akisussaaffeqarfiata ataaniittup, soraarnerussutisiassanut ileqqaartussaaneq pillugu maleruagassanik inatsisit unioqqutillugit aqutsineranik pasilliutinik ilungersunartunik saqqummiussaqarpoq. Tamannarpiarlu siunersiuinermi sammineqartussaavoq.

Allakkiaq Vittus Qujaukitsup Naalakkersuisoqataanit, Inuussutissarsiornermut Naalakkersuisumit Jess Svanemit, imminnerneqarsimavoq. DLA Piperillu Akileraartarnermut Aqutsisoqarfimmik nalilersuineq suliarisimavaa - Aningaasaqarnermut Naalakkersuisoqarfik aamma Akileraartarnermut Aqutsisoqarfik ilisimateqqaarnagit.

Naalakkersuisut Siulittaasuata attaveqarfiginissaa inassutigigaa

Eqqartuussissuserisut suliffeqarfiat DLA Piper aallarniummi allakkiap kimit innniminnerneqarsimaneranik allaatiginnippoq:

- Naalakkersuisup Jess Svanep Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisoqarfik qinnuigisimavaa uatsinnut (DLA Piper, aaqq.) saaffiginneqqullugu inatsimmi (soraarnerussutisiassanik ileqqaartussaatitaaneq pillugu, aaqq.) pissutsit ataasiakkaat, inatsisip nassuiarneqarnera pissusiviusunilu atorneqarnera pillugit allakkiamik suliaqarnissamik qinnuiginiarluta, DLA Piperimi eqqartuussissuserisoq, Per Vestergaard Pedersen, allappoq.

Namminersorlutik Oqartussani tusarfinnit Sermitsiaq.AG-mut oqaatigineqarpoq, naalakkersuisoqarfiup suliassaqarfimmik nammineq akisussaaffiginngisaminik misissuisitsinissamik inniminniissuteqarsimanera nalinginnaanngilluinnartuusoq.

DLA Piperimit allakkiaq ullulerneqarsimavoq 24. januar 2020.

Naalakkersuisoqarfiup pisortaa Jørn Skov Nielsen ulloq taannarpiaq Naalakkersuisumut Jess Svanemut allakkiorpoq. Tassani DLA Piperimit inerniliissutigineqartut nassuiaatigai Naalakkersuisunilu qinnuigalugu Naalakkersuisut siulittaasuat aamma Aningaasaqarnermut Naalakkersuisoq attaveqarfigeqqullugit.

Isumasioqatigiinnissaq sioqqutitsiarlugu tunniunneqartoq

Naalakkersuisoqarfiup Jess Svanellu allakkiap imarisai siunersiuinissaq ullunik arlalinnik sioqqullugu tassa ilisimaarisimavaat.

Allakkiarli Vittus Qujaukitsumut Naalakkersuisoqarfianullu aatsaat atasinngornermi januaarip 27-ani, siunersiuinissaq sioqqutitsiarlugu, tunniunneqarpoq. Tamanna pappiaqqani Sermitsiaq.AG-p takunnissinnaatitaanikkut pissarsiarisimasaani atuarneqarsinnaavoq:

- Naalakkersuisoq siunersiuinissaq akunnialunnik sioqqullugu inatsisigut oqallinnermi illuatungiusumit saqqummiussamik 31-nik quppernilimmik allakkiatut iluseqartumik, eqqartuussissuserisut suliffeqarfianni DLA Piperimi suleqataasumit Per Vestergaard Pedersenimit suliarineqarsimasumik, tigusaqarpoq. Allakkiamit soraarnerussutisiassanik ileqqaartussaatitaaneq pillugu inatsisip aqunneqarnerata inatsisinut naapertuunnera apeqquserniarneqarpoq. Allakkiap suliarineqarnerani oqartussat piginnaasaqartut akuutinneqarsimanngitsut, pappiarani allassimasoqarpoq.

DLA Piperimit allakkiaq Vittus Qujaukitsumut, Namminersornerup oqaluttuarisaanerani siullermeersumik ammasumik siunersiuisoqarnissaanut taamaammallu tusagassiorfinnit eqqumaffigineqartorujussuusumut, tassa sakkortuumik sunniuteqarsimavoq.

Vittus Qujaukitsoq avoqqaarineqartoq

Vittus Qujaukitsup allakkiaq isorinnilluinnartoq isumasioqatigiinnermi ima qisuariaateqarfigaa:

- Ajoraluartumi uanga sulisumaluunniit allakkat peqqissaartumik atuarnissaat piffissaqarfigisimanngilarput. Kisianni allakkat imarisaat isumaliutigeqqissaarneqartariaqarput. Tamanna tunngavigalugu aningaasaqarnermut aqutsisoqarfik inuttut nammineerlunga qinnuigisimavara, isornartorsiorneqartu Naalagaaffiup eqqartuussissuserisuanit misissorneqassasut, tamannalu piaarnerpaamik pisariaqartoq, Vittus Qujaukitsoq ammasumik siunersiuinermi ilaatigut oqarpoq.

Oqaaseqaat illuatungiliuttunit sakkortuumik qisuariarfigneqarpoq, Vittus Qujaukitsullu allakkiamik tamanut saqqummiussiumannginnera naammagineqanngilluinnarluni.

- Isertuussiniarneruvoq tupinnartoq, ilaatigut IA-p siulittaasua Múte B. Egede, oqarpoq, inerniliilllunilu: - Pasinapiluppoq.

Allakkiaq isorinnittoq tunngavigalugu Vittus Qujaukitsoq naalakkersuisoqarfialu Aningaasaqarnermut Naalakkersuisoqarfik Naalagaaffiup eqqartuussissuserisuani nalilersuinermik allamik inniminniipput, Eqqartuussissuserisut suliffeqarfanni Poul Schmidtimi, Akileraartarnermut Aqutsisoqarfimmik unioqqutitsisimannginneraasumi.

Jess Svane nipaqanngilaq

Inuussutissarsiornermut Naalakkersuisoq Jess Svane Sermitsiaq.AG-p attaveqarfigaa nassuiaaqqullugu, suliaq akisussaaffiginngisani misissuiffigineqarnissaa sooq suliassanngortissimaneraa.

Ilanngullugu paasiniarsimagaluarparput misissuinermit nalunaarusiaq tallimanngornermi ualikkut tiguneqarsimasoq, aatsaat ataasinngornermi ullup qeqqata missaani tunniunneqarsimanersoq. Tassa siunersiuinissaq nalunaaqutaq 15.00 aallartittussaasoq akunnialunnik sioqqullugu.

Jess Svanep allattaa aqqutigalugu ilisimatinneqarpugut, naalakkersuisoq suliami oqaaseqarnianngitsoq.