Naalakkersuisoqarfiit eqqartuussissuserisutigut akunnerminni aaqqiagiinngissuteqartut

Inuussutissarsiornermut Naalakkersuisoq Jess Svane nalinginnaanngilluinnartumik aalajangiussaqarsimavoq, eqqartuussissuserisut suliffeqarfiannit DLA Piperimit misissuisitsinissamik inniminniigami.

Eqqartuussissuserisut suliffeqarfiat Akileraartarnermut Aqutsisoqarfiup soraarnerussutisiassanik ileqqaartussaatitaaneq pillugu maleruagassanik aqutseriaasianik misissuisussaasimavoq.

Jess Svanep aalajangernerata immikkuullarissutigisaa tassaavoq, Akileraartarnermut Aqutsisoqarfiup Inuussutissarsiornermut Naalakkersuisoqarfiup ataaniinnginnera. Tamatuma akerliani Akileraartarnermut Aqutsisoqarfik Aningaasaqarnermut Naalakkersuisoqarfiup ataaniippoq.

Jess Svanep naalakkersuisoqarfiullu pisortaata Jørn Skov Nielsenip Aningaasaqarnermut Naalakkersuisoqarfik aamma ilisimatissimanngilaat, soraarnerussutisiassanut akiliutissat ataatsimut katillugit 75 millioner koruunit amigaataasut pillugit suliami eqqartuussissuserisut misissuinissaannik inniminniisoqarsimaneranik.

Ilungersunartunik inerniliissuteqartut

DLA Piper misissuinermini Akileraartarnermut Aqutsisoqarfiup soraarnerussutisiassanik ileqqaartussaaneq pillugu aaqqissuussinermik aqutsinera pillugu ilungersunarluinnartunik inerniliissuteqarsimavoq.

DLA Piper taamaalilluni inerniliivoq, Akileraartarnermut Aqutsisoqarfik inatsisit sanioqqullugit iliuuseqarsimasoq.

• Akileraartarnermut Aqutsisoqarfik procentinik ilanngaatissanik qaffasippallaanik inatsisit unioqqutillugit aalajangersaasimasoq.
• Akileraartarnermut Aqutsisoqarfik soraarnerussutisiaqalernissamut aningaasaateqarfimmut imaluunniit aningaaserivimmut aaqqissuussinerit aqunneqarnissaat pillugu isumaqatigiissuteqartoqartinnagu aningaasanik akiliisitsiniarnissamut tigusinissamulluunniit piginnaatitaaffeqarsimagunanngitsoq.
• Aningaasat akiliutigineqartut ilaat inatsisinut naapertuussimanngitsut.
• Akileraartarnermut Aqutsisoqarfik misissuisusssaatitaanerminik naammassinnissimanngitsoq.

Isorinnissutit ilungersunartut Aningaasaqarnermut Naalakkersuisoqarfimmut nassiunneqarput, taassumanngalu Jess Svanep akileraartartut akiligaannik eqqartuussissuserisunik misissuisitsineq aqqutigalugu Aningaasaqarnermut Naalakkersuisoqarfimmut akuliussimanera uissuummissutigineqarluni.

DLA Piperimit inerniliussat Aningaasaqarnermut Naalakkersuisoqarfimmit tupigutsaatigineqarput, periarfissamillu allamik takusaqarsinnaanani kisianni tassa eqqartuussissuserisut misissuinerannik nutaamik innimiisariaqalerluni. Tamatumuuna naalagaaffiup eqqartuussissuserisua Kammeradvokaten Akileraartarnermut Aqutsisoqarfiup soraarnerussutisiassanik suliamik aqutsinera pillugu pissutsinik misissuinissamut suliassineqarpoq.

Tunngavissaq tamakkiisuunngitsoq

Sermitsiaq.AG naalagaaffiup eqqartuussissuseriuata suliamik nalilersuineranik allagaatinik takunnissinnaanissamut aamma akuerineqarsimavoq, taakkunanngalu takutinneqarpoq, naalagaaffiup eqqartuussissuserisua DLA Piperimik qitiusumik isornartorsiorneqartunut sanilliullugu paarlattorluinnaanik inerniliisimasoq.

Naalagaaffiup eqqartuussissuserisua aalajangersimalluinnartumik inerniliivoq, Akileraartarnermut Aqutsisoqarfiup maleruagassanik aqutsinera inatsisinut naapertuulluinnartuusoq.

Eqqartuussissuserisoq Karsten Hagel-Sørensen, nalilersuinermik 32-nik quppernilimmik suliaqarsimasoq, Aningaasaqarnermut Naalakkersuisoqarfimmut mailikkut allappoq:

- Eqqartuussissuserisut taama assigiinngitsigisunik inerniliisinnaanerat ajuusaarnartuuvoq, Karsten Hagel-Sørensen allappoq.

Taanna naliliivoq, DLA Piper tunngavissat tamakkiisuunngilluinnartut aallaavigalugit allakkiorsimasoq, eqqartuussissuserissorlu tamatumani ilaatigut aningaasanut inatsimmi allassimasumik qitiusumiittumik eqqumaffiginnissimanngitsoq. DLA Piper Akileraartarnermut Aqutsisoqarfimmi atortussanik aamma apersuutiginnissimanngilaq, suliap allatut inerniliiffigineqarneranik kinguneqarsimasinnaagaluartunik, Karsten Hagel-Sørensen naliliivoq.

- DLA Piper Akileraartarnermut Aqutsisoqarfimmut saaffiginnilluni atortussanik aamma ujartuisimanngilaq tigusaqarsimananiluunniit suleriaatsitut DLA Piperimit ilimagineqartup eqqartuussissuserisullu suliffeqarfiata misissuineranut tunngaviusup erseqqissaarneqaatigisassaannik, Karsten Hagel-Sørensen oqaaseqaatimini allappoq.

Sooq Jess Svane Aningaasaqarnermut Naalakkersuisoqarfiup akisussaaffeqarfia iserfiginiarlugu aalajangersimanersoq allakkiani, Sermitsiaq.AG-p allagaatinik takunnissinnaatitaanermik akuerineqarnermigut pissarsiarisimasaani, takuneqarsinnaanngilaq.