Naaja mittarfiit pillugit: Atulernissaasa kinguartinnerat uggornarpoq
Nuummi mittarfissap aamma Ilulissani mittarfissap atulerneqarnissaat maanna tamarmik ukiumik ataatsimik kinguartipput.Tamanna ajuusaarnarpoq, mittarfiilli taakku pineqartut pillugit pilersaarutit kinguaattoortoqarnerani allanngornavianngillat, Naalakkersuisoq oqarpoq.
Kalaallit Airports ataasinngormat nalunaaruteqarput Nuummi mittarfissap atulernissaa ukioq ataatsimik kinguartinneqartoq. Mittarfissaq 2023-mi atulernani, aatsaat 2024-mi ammarsinnaalissaaq.
KAIR-ip kinguaattoornermut tunngavilersuutigai Covid-19-ip nunatsinni tunillaassuunnera oqartussallu mittarfiup atortussaanut sanaartornissaanullu piumasaqaatai nutaat.
Kinguaattoorneq, attaveqaasersuutinut Naalakkersuisoq, Naaja H. Nathanielsenip (IA) uggoraa.
- Soorunami uggornarluinnarpoq. Piffissaliussaq pilersaarutigineqartup malinneqarnissaa takorusunnerugaluarpara, pingaartumik inuussutissarsiortut namminersortut mittarfissap ammarnissaanut suliffeqarfiutiminni aningaasaliissuteqarsimasut, neriuutigigaluaramikkumi piffissaq eqqorlugu mittarfik atulissasoq, Naaja H. Nathanielsen Sermitsiaq.AG-mut oqarpoq.
Ilulissani mittarfissap ammarnissaa aamma ukiumik ataatsimik kinguartinneqartoq siornali nalunaarutigineqarpoq. 2023-mi ammartussaagaluartoq, maanna 2024-mi ammartussanngorpoq. Naalakkersuisup qularnaarsarpaa kinguaattoorneq isumaqanngitsoq Nuummi Ilulissanilu mittarfissap takissusissaasa allanngortinneqarnissaat.
- Kinguaattoorneq isumaqassanngilaq Nuummi Ilulissanilu mittarfissat takissusaannik allanngortitsineq. Peqqutissaqanngilaq allanngortitsinissamut. KAIR-ip siulersuisui pisortaqarfialu ilisimatitsipput kinguaattoornermi aningaasartuuteqarnerusoqarnavianngitsoq, oqarpoq.
Qaqortoq pillugu apeqqut utaqqineqartoq
Qaqortumi mittarfissaq qanoq isikkoqarumaarnersoq suli nalunarallarpoq. Qaqortumi mittarfissaq pillugu nalilersuinermi nalunaarusiaq Naalakkersuisut augustimi tigusussaasimavaat. Misissuinermit nalunaarusiat tunngavigalugit, kiisalu kommunalbetyrelse, Inatsisartut aamma tamat ammasumik peqataatillugit suliaqarnermi, Qaqortup mittarfissaa pillugu Naalakkersuisut tunngaveqarlutik aalajangiinissartik naatsorsuutigaat.
- Misissuinerni aalajangiisartut, Qaqortup mittarfissaa pillugu eqqortumik aalajangiinissamut sakkussaannik tunineqarnissaat naatsorsuutigaara. Inatsisartut, ataatsimiititaliat, kommunalbestyrelsi aamma inuit tamat akuutinneqarnissaat ingerlaavartumillu ilisimatinneqartarnissaat anguniagaraa, Naaja H. Nathanielsen julimi apersorneqarami oqarpoq.
Misissuinermit nalunaarusiap sapaatip akunnermi matumani avammut saqqummiunneqarnissaa naatsorsuutigineqarpoq.
Mittarfik akisunerusoq
Qaqortumi mittarfissamik suliariumannittussarsiuussinerit marluk ingerlanneqareerput. Suliassamulli neqeroortut tamarmik aningaasaliissutit sipporlugit missiliunneqarsimasut neqerooruteqartarsimapput. Taamaammat mittarfiliortitsinissaq suliarineqalissappat suliniut annikillilerlugu sipaarfiusariaqassaaq imaluunniit immikkut aningaasaliiffigineqaqqittariaqassalluni.