Ilulissani atlantikukkoortaatinut mittarfissaq ukiumik ataatsimik kinguaattoorfiussasoq

Kalaallit Airportsimit ilisimatitsissutigineqarpoq, Ilulissani atlantikukkoortaatinut mittarfissaq minnerpaamik qaammatinik aqqaneq-marlunnik kinguaattoorfiussasoq. Tamatuma saniatigut Covid-19-ip mittarfilionermut aningaasatigut qanoq kinguneqarsinnaanera misissuiffigineqarpoq.

Attaveqaqatigiinnermut Naalakkersuisup Karl Frederik Danielsenip, Tillie Martinussenip paragraf 37 naapertorlugu apeqqutaanut akissutaani atuarneqarsinnaavoq, Nuummi mittarfiliorneq ima kinguaattooqqatigisoq, allaat Ilulissani mittarfissap nutaap ammarneqarnissaanut sunniuteqarsinnaalluni.

- Nuummi sanaartornissap kingusinaartumik aallartinneqarnerata, 2019/20-p ukiuunera
nalinginnaasuminngarnit silarluttarnerata, covid-19-imillu patsiseqartumik 2020-mi
marsimit maajip tungaanut suliaqarnerup killeqarsimanerata kingunerisaanik, Nuummi
sanaartorneq qaammatit marluk-pingasut missaannik massakkut kinguaattooqqavoq, mittarfinnut ingerlatseqatigiiffimmit Naalakkersuisullu Siulittaasuata Naalakkersuisoqarfianit nassuiaatigineqarpoq.

Kalaallit Airportsip Nuummi tunniussinissamut killissarititap nutarterneqarnissaa Munck Gruppenimut maanna isumaqatiginninniutigaa, tassa Nuummi tunniussinissamut killissarititap kinguaattoorfiunnginnissaa anguniarlugu.

Asfaltilersuinissaq kinguartinneqartariaqartoq

- Illuatungaanili Ilulissani mittarfiliornerup naammassineqarnissaa qaammatinik aqqaneq-marlunnik kinguaattuussasoq naatsorsuutigineqarpoq. Matumani Nuummi Ilulissanilu sanaartornerit entreprenørimit ataatsimit, Munck Gruppen A/S-imit suliarineqarnerinik patsiseqarpoq. Nuummi kinguaattoorneq iluarsiumallugu, pilersaarutigineqaqqaartuminngarnit sivisunerusumik Nuummi annerusumik Munck Gruppen suliaqarniarpoq, taamaalillunilu Nuummi sulisut atortullu amerlanerpaartaat nuutsinneqarnissaat 2022-p tungaanut kinguartinniarlugu, akissuteqaammi allassimavoq.

- Mittarfiliassat taakku marluk annertuumik asfaltilersuilluni naammassineqartussaammata, issittumilu asfaltilersuisoqarsinnaanngimmat, asfaltilersuinermilu pitsaassuseq qaffasittorujussuusussaammat, Ilulissani asfaltilersuinissaq 2024-p aasaaneranut kinguartinneqarpoq, ilisimatitsissutigineqarpoq.

Piffissaliussaq nutaaq

Massakkut piffissaliussaq naapertorlugu, Nuummi mittarfissaq pilersaarutigineqartutut
2023-mi ukiup sisamarterutaata sisamaani atuutilissasoq naatsorsuutigineqarpoq.
Piffissaliussaq nutartigaq naapertorlugu Ilulissani mittarfissaq 2024-mi ukiup
sisamarterutaata pingajuani, sisamaaniluunniit atuutilissasoq naatsorsuutigineqarpoq.

- Qaqortumi mittarfiliornissamut isumaqatigiissutissaq suli isumaqatigiissutigineqanngilaq,
taamaakkaluartorli pingaarnertut piffissaliussaq naapertorlugu 2023-mi ukiup
sisamarterutaata sisamaani atuutilernissaa suli sulissutigineqarpoq, Karl Frederik Danielsenip akissutaani atuarneqarsinnaavoq.

Aningaasaqarneq misissorneqartoq

Covid-19-ip kingunerisaanik aningaasaqarnikkut kinguneqaataasinnaasut aamma misissorneqartut, akissuteqaammi atuarneqarsinnaavoq.

Powered by Labrador CMS