Nuuk: Mittarfissap ammarnissaa ukiumik ataatsimik kinguartinneqarpoq
Covid-19 pissutigalugu pissutsit oqartussallu mittarfeqarfiup sanaartorneranut atortussaanullu piumasaqaatai nutaat pissutigalugit, KAIR nalunaarpoq Nuummi mittarfissap ammarneqarnissaa ukiumik ataatsimik kinguartinneqartoq.
Nuummi timmisartorsuarnut mittarfissap atulernissaanut pilersaarutit kinguartinneqarpoq.
Covid-19 pissutigalugu ajornartoornerit kinguaattoornerillu, kiisalu oqartussat mittarfissap sanaartorneranut atortussaanullu piumasaqaataat nutaat kinguaattoornermut ilaatigut pissutaapput. Nuummi mittarfissuassaq ukiut marluk qaangiuppata ammaanersiortussaagaluartoq, aatsaat 2024-mi ammaanersiorneqartussanngorpoq.
KAIR tusagassiorfinnut nalunaaruteqarluni taama allappoq.
KAIR-ip ilanngullugu ilisimatitsissutigaa kinguaattoortoqaraluartoq, taamaattoq maannakkut missingersuutigineqartut aamma saniatigut taarsigassarsiat 900 milliuunit koruunit upernaaq nalunaarutigineqartutut iluanni mittarfissualiorneq naammassineqarsinnaavoq.
- Uggoraarput, mittarfiup 2024-mut kingusinaarnissaa. Nalunngilarput suliffeqarfinnut, ammarnissaanut maannakkorpiaq piareersartunut kinguneqarsinnaasoq. Pisoq taanna pinngitsoortinniarlugu suna tamaat tikillugu sulisimavugut kisiannili ingammik COVID-19-eqarnera suliniummut pissuanartunik ilimaginngisanik arlalinnik kinguneqarsimavoq, taamalu ajoraluartumik aallaqqaammut piffissamut pilersaarutip eqqortinnissaa ajornarsisillugu, KAIR-imi pisortaaneq Jens Lauridsen, taama oqarpoq.
Corona 2021-mi unikaallatsitsisoq
KAIR mittarfissualiortitsinermi angusassat 2021-mi naammassiuminaatsissimavai, KAIR oqaluttuarpoq.
- Ingammik 2021-mi aasap ingerlanerani sanaartornermi killiffiit pisariaqartut angunissaat ajornakusoorsimavoq, pissutigalugu suliassinneqartuni immikkut ilisimasallit sulisullu amerlasuut Nuummut ingerlanissaat COVID-19 pissutigalugu pitsaalineqarsimammat, KAIR ilisimatitsivoq.
Illoqarfimmik matusigallartarnerit, timmisartuussinerit unitsikkallartarneri kiisalu mattusimagallartitaasarsimanerit kingunerannik, mittarfissuassap asfaltilersorneqarnissaa aasakkuinnaq ingerlanneqarsinnaasoq kinguartinneqartariaqarsimavoq.
Piumasaqaatit nutaat
- Taakkua saniatigut KAIR-i piumasaqaatit nutaat arlallit, aallaqqaammut piffissamut pilersaarutip aalajangiunneqarnerata kingorna ilanngunneqarsimasut ilanngunniarlugit aallussisimavoq. Assersuutigalugu timmisartunik angallannermut pisortaqarfinnit mittarfimmut aamma pisortanut uppernarsaanissamut piumasaqaatit nutaat atuutilersimapput, KAIR ilisimatitsivoq.
- Allat saniatigut suliassat taakku ilaat ataaseq kisimi pineqanngilaq pisulli ataatsimut amerlassusaat, sanaartornermi 2021-mi aasaanerani qaammatit iluanni killiffiit pingaarutillit anguneqannginneri aalajangiisuusimapput. Naggataatigut ajoraluartumik Nuummi mittarfiup nutaap tunniunnissaata ukiumik ataatsimik 2024-mut kinguartinnissaa pisariaqalersimavoq, Jens Lauridsen oqarpoq nangillunilu:
- Kisianni maannakkut ammarnissaata tungaanut piffissamut pilersaarut nutaaq piareerpoq, qilanaarpugullu mittarfinnik nutaanik pilersitsinermi ingerlaqqinnissatsinnut, taakku Kalaallit Nunaanni siunissami ineriartornermut sakkunut pingaarnerpaanut ilaapput, oqarpooq.
Ilulissani mittarfissuassap ammarneqarnissaa ukiumik ataatsimik aamma kinguaattoorfioreerpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
