Kujataani mittarfik pillugu aalajangerniarneq sivitsortoq
Aalajangerneq sapaatip-akunneri marluk ingerlanerini pissasoq, Naaja Nathanielsen tassani Sermitsiaq.AG-mut ilisimatitsivoq. Aalajangernissarli suliniut pillugu misissueqqissaarnerit piareernissaannut kinguartinneqartoq, Naalakkersuisut maanna nalunaarput.
Ineqarnermut, Attaveqarnermut, Aatsitassanut Naligiissitaanermullu Naalakkersuisoq Naaja Nathanielsen (IA) qanittukkut nalunaaruteqarpoq, Qaqortumi mittarfiup neqerooruteqarfiginissaanut aalajangerneq piaarnerpaamik pissasoq, qanoq pisoqarnissaanik innuttaasut ersarissumik nalunaarfigineqarniassammata.
Nuummi, Ilulissani Qaqortumilu mittarfiliortiternissat pillugit killiffik aningaasaqarnerlu pillugit juunip 25-anni nassuiaammik nutaamik saqqummiussisoqarneranut atatillugu nalunaarneq pivoq.
Aalajangerneq sapaatip-akunneri marluk ingerlanerini pissasoq, Naaja Nathanielsen tassani Sermitsiaq.AG-mut ilisimatitsivoq. Aalajangernissarli suliniut pillugu misissueqqissaarnerit piareernissaannut kinguartinneqartoq, Naalakkersuisut maanna nalunaarput.
- Suliat inerneri 2021-mi aggustimi ataavartumik saqqummiunneqartassasut naatsorsuutigineqarpoq. Suliat inerneri tunngavigalugit Naalakkersuisut partiinik Inatsisartunillu suleqateqarlutik, kiisalu inuit tamat kommunilu oqaloqatigalugit suliap ingerlaqqinnissaanut aalajangiissapput, pingasunngornermi tusagassiuutinut nalunaarummi tamanna oqaatigineqarpoq.
Aappassaanik neqeroortitsineq sulilu aalajangiisoqanngitsoq
Ukiup aallartinnerani neqeroortitsineq naammassineqarpoq, kisianni Sermitsiaq.AG-p paasissutissaatai naapertorlugit aappassaanik neqeroortitsinermi neqeroorutit missingersuutit sinnerujussuarpaat. Taamaalilluni amerlanerusunik aningaasanik pissarsiniartoqartariaqarpoq imaluunniit mittarfiliornissaq naammassissappat suliniummi sipaaruteqartoqartariaqarpoq.
Mittarfik qangali utaqqineqartoq neriorsuutigineqartutut 1500 meterisut imaluunniit naannerussanersoq, innuttaasut taamaalillutik nalornisinneqarput.
- Utaqqineq kipiluttunartoorfiusinnaammat paasilluarpara, kisiannili qinnutigissavara naammagittarneq sivisunerulaartumik atorneqassasoq. Aalajangiinerup pinngitsoortinneqarnissaa siunnerfigineqanngilaq, kisiannili piaartumik eqqorluinnartumik aalajangiinissamut tunngavissaqarnissaq siunnerfigineqarluni, Naaja Nathanielsen aalajangiinerup kinguartinneqarneranut atatillugu taama oqaaseqarpoq.
Upernaaq aalajangerneqartussaagaluartoq
Kalaallit Airportsip ukiumoortumik 2020-mut nalunaarusiamini ilisimatitsissutigaa, sanaartugassanik suliarinnittartoq ajugaasoq Qaqortumut 2021-imi apriilimi/maajimi toqqarneqarnissaa naatsorsuutigineqartoq, kisianni suliaq suli tassunga killinngilaq.
Ineqarnermut, Attaveqarnermut, Aatsitassanut Naligiissitaanermullu Naalakkersuisup Naaja H. Nathanielsenip, suliniut pillugu aalajangiinnginnermi maanna misissuinerit qilanaarai.
- Misissuinerit ingerlanneqartussat inernissaat soqutiginnillunga utaqqivakka. Misissuinerni aalajangiisartut eqqortumik aalajangiinissamut sakkussaannik tunineqarnissaat naatsorsuutigaara. Inatsisartut, ataatsimiititaliat, kommunalbestyrelsi aamma inuit tamat akuutinneqarnissaat ingerlaavartumillu ilisimatinneqartarnissaat anguniagaraara, taamaalillunilu suliami aalajangiinissamut tunngavissat ammaffigineqarnissaat pilersinneqarluni, Naaja Nathanielsen oqarpoq.