Qaqortumi timmisartoqarfissaq suli akisuallaaqaaq
Qaqortumi timmisartoqarfiliorniarnermut suli aningaasassaalatsisoqarpasippoq. Sermitsiaq.AG-ip paasissutissaatai naapertorlugit suliariumannittussarsiuusseqqinnermi akikinnerpaamik neqeroorutigineqarsimasut én milliard koruunit sinnerpai.
Kalaallit Airports Qaqortumi timmisartoqarfiliornissaq pillugu siorna aggustusip qaammataank isumaqatigiissuteqarsinnaasaimanngilaq, suliaranninnissamut neqeroorutigineqarsimasut missingersuusiat sinningaatsiarsimammatikkit.
Taamaammat ukiup matuma aallartinnerani suliariumannittussarsiuusseqqittoqarsimavoq. Ingerlatseqatigiiffiup ukiumoortumik nalunaarusiamini ilisimatitsissutigaa, timmisartoqarfiliornerup naammassineqarsinnaanera suli qularnartinneqarmat, suliariumannittussarsiuussinerit tamarmik suliffeqarfiit namminneq aalajangiiffigisassaattut ingerlanneqarsimasut.
Suliariumannittussarsiuussineq martsip qaammataani naammassineqarpoq, aningaasanulli tunngasortai suli ajornartorsiutigineqarlutik
Sutigut tamatigut aningaasartuuteqarneruneq
Tusarfiit arlallit naapertorlugit, mittarfiliornissamut mittarfiullu illutassaanik sanaartornissamut en milliard koruuningajalluinnaat neqeroorutigineqarsimasunit akikinnerpaapput, tassa timmisartoqarfiliornissamut 570.000 koruunit missaannik aningaasaliissuteqarnissamik isumaqatigiissutaasimasut marloriaatingajalluinnai.
Kujataani timmisartoqarfiliorniarneq aningaasatigut kisimi unammillernartinneqannglaq. Februaarip qaammataani saqqummiunneqarpoq, Kalaallit Airports International Nuummi Ilulissanilu timmisartoqarfiliornermi immikkut aningaarsartuutigisanut 900 millioner koruuninik taarsigassarsiniarniartoq.
Qaqortumi timmisartoqarfiliornissamut suliariumannittussarsiuussineq taamaatiinnarneqarmat, KAIR-ip siulersuisuini siulittaasuusimasup Johannus Egholm Hansen ilisimatitsissutigaa, ingerlatseqatigiiffimmi aqutsisut Namminersorlutik Oqartussat isumasioqatigalugit, aningaasartuutissat appartinnissaat siunertaralugu, suliassamut allannguutaasinnaasut suussusersiniarlugit suliaqarneq ingerlateqqinniaraat.
Mittarfik naannerusoq oqaluuserineqarsimasoq
Sermitsiaq.AG-ip paasissutissaatai naapertorlugit, tassunga atatillugu mittarfik naannerusoq oqaluuserineqarsimavoq, mittarfiliornerup akikinnerunissaata saniatigut timmisartoqarfiup illutassaasa akissaasa aamma appartinneqarsinnaaneri pissutigalugit.
Mittarfik pilersaarutaasutut 1.500 meteriusumit naannerulersinneqassappat nunat tamalaat timmisartorsuinit miffigineqarsinnaanani taamaallaat Dash-8-nit miffigineqarsinnaassaaq, taamalu illutassai ilaasunut ikinnerungaatsiartunut naapertuuttumik suliarineqarsinnaallutik, tamannalu suliassamut akikillisaataassalluni. Taamaalilluni suliassaq tamarmiusoq 20-30 procentinik akikinnerulissasoq missingerneqarsimavoq.
Aningaasatigulli unammillernartoqartitsinermut tamanna aaqqiissutaassanersoq manna tikillugu isumaqatigiissutigineqarsimanngilaq. Naalakkersuisut sapaatip akunnerani matumani ilisimatitsissutigisimavaaat, suliat sumut killinnera aningaasaqarnerullu qanoq inissisimanera pillugit Inatsisartut innuttaasullu qanittukkut ilisimatinneqassasut.
Ingerlatseqatigiiffimmit 2020-mut ukiumoortumik nalunaarusiami ilisimatitsissutigineqarpoq, Qaqortumi timmisartoqarfiliornissamut suliariumannittussarsiuussinermi sanaartortussatut kikkut toqqarneqarsimanersut april/maj 2021-mi saqummiunneqassasoq, tamannali suli anguneqaqqajanngilaq.