- Hey, tuniniaasumik nalunngisaqarpit?

Ukiutoqaavoq, taannalu festerluarniarpoq, ilinniartoq 20-t sinnerlugit ukiulik taama oqaluttuarpoq. Taassuma kinaassusaa aaqqissuisoqarfiup ilisimavaa, angulli taanna kinaassutsiminik isertuusserusuppoq.

Ikinngutini arnaq festernermi Ritalininik pisarnermik nuannarisaqartumik ineqateqartoq aperaa.

- Eqqarsarpunga sumi pisisinnaassanersunga nalussanngikkaa.

Ilinniartoq attaveqarfigisinnaasaminik atimik pissarsivoq – kinguninngualu Ritalininik iisartakkanik pingasunik pissarsivoq. Nalunaaqutaq 20.00 nallilerpaa. Nerereerpoq, perusussuseqarneralu takkutilerpoq.

- Aallaamassutigisinnaasannik pisariaqartitsillunga malugisinnaavara.

Iisartagaq pinnginnerani aserorteqqaarpaa.

Akii nikerartut

Sermitsiaq.AG-p allaaserisani arlalinni Ritalinip inunnut adhd-ertunut aamma narkolepsimik nappaateqartunut ulluinnarni iluaqutigineqartartoq, inuit ilaannit unioqqutitsilluni tuniniaasoqarneranit atornerlunneqartartoq qulaajartareerpaa.

Ilinniartup ilaannikkooriarluni festernermini taanna pisarlugu nassuiaavoq. Piffissami sivikitsumi nukissanitsillugulu nuannaalersittarpaa, taanna oqaluttuarpoq.

Ukiutoqqami iisartagaq ataaseq 150 koruunilerlugu pisivoq, kisianni taassuma oqarnera naapertorlugu akii 100-t aamma 200 koruunit akornanni nikerartarput.

- Pissarsiarinissaat ajornanngitsuararsuuvoq. Inummik adhd-ertumik aningaasanik amigaateqartumik nalunngisaqaannartariaqarpoq.

Tuniniarneqartartut amigaataasut

Piffissap ilaani sukkut tamaana iisartakkanik pissarsiffissaasarnera ilinniartup nassuiarpaa, kisianni Ritalininik puussianik marlunnik maannakkorpiaq tuniniarneqartunik peqartoqarneranik maluginiagaqarsimanngilaq.

- Tuniniarneqartartut amigaataasartut isumaqarpunga, tassami akit sukkasuumik nikerartarput, taanna oqarpoq, nangillunilu:

- Annerusumik inuit adhd-mik nappaateqartut pissarsiarineqartarput. Facebookimi allaffigisarpagut: ”Ritalinimik tunisaqarusussinnaavit?”, tassanngaanniillu namminneq aalajangissavaat, taanna oqarpoq, eqqussorneqartarnerinillu tusagaqarsimanani aamma oqaatigaa.

LÆS OGSÅ: Ritalin politiinit ukkatarineqarpoq

Vicepolitiinspektørip oqarnera naapertorlugu Kalaallit Nunaanni Politiit 2022-mi misissuinerminnut atatillugu Ritalin qulingiluariarluni siumorneqarsimavoq, ilinniartullu peqatigisartakkamini amerlanngitsut Ritalinimik aanngajaarniarnermik misiliisimasut nalunagu ilisimatitsivoq.

Ritalin ilisimaneqartoq

Suliat qulingiluat amerlavallaanngillat, ilinniartoq isumaqarpoq, Ritalin ukiuni kingullerni aanngajaarniutitut siaruariartorsimasoq taassuma maluginiarpaa.

- Ilinniarnertuunngorniarallarama inuit Ritalinimik pisartut qaqutigut tusarsaasarput. Maanna tusakulanerusalerpara:

- Nuummi inuit Ritalin ilisimavaat, illoqarfik anginngilaq, kikkullu tamarmik festeqatigiittarput.

Avatangiisit tamarmik taamaattuunnginneri taassuma naqissuserpaa, kisianni ilinniartup avatangiisaani Ritalinimik atornerluineq takussaavoq.