Nakorsaaneq: Nakorsaasiunneqartunik tuniniaaqqilluni iluanaarniartoqartarpoq
Innuttaasut amerliartuinnartut adhd-mik nappaateqartutut nalunaarsorneqartalerput. Ritalinit unioqqutitsilluni tuniniarneqartarnerat pinaveersaartinniarlugu, Peqqinnissaqarfiup nakorsiartunik nakkutiginninnerup maanna sakkortusineqarnissaa Nakorsaaneqarfiup qinnuigaa.
Ritalin unioqqutitsilluni tuniniarneqartarpoq.
Tusarfiit arlallit, Kalaallit Nunaanni Politiit, Nunatta Nakoraaneqarfia aamma innuttaasut Sermitsiaq.AG-mut tamanna uppernarsarpaat. Kisianni inunnit adhd-eqanngitsunit imaluunniit narkolepsimik napparsimanngitsunit atornerlunneqartartut suminngaanneerpat?
Vicepolitiinspektørip oqarnera naapertorlugu, Ritalinimut tunngatillugu pinerluttarnerit tassaanerusarput inunnut nakorsaasiunneqartunik tuniniaaqqittoqartarnera.
Ritalinip unioqqutitsilluni tuniniarneqartartup suminngaanneernera pillugu uppernarsaatissaqarnani, nakorsaaneq Henrik L. Hansen ilisimatitsivoq.
Qaffariangaatsiartut
Tamakku peqqinnissaqarfimminngaanneernersut imaluunniit anngiortumik eqqussorneqarnersut naluara. Immaqa taakku marluutillugit, taanna nangilluni oqarpoq.
- Kisianni amerlanerusut iisartakkanik tigummiaqartillugit Ritalinimik atornerluisoqarnissaanut periarfissaq annertuneruvoq – Ritalininillu nakorsaaserneqartartut malunnartumik amerliartorput, Henrik L. Hansen oqarpoq.
Nunatta Nakorsaaneqarfiani kisitsisit tamanna uppernarsarpaat. Ritalinit pisiarineqartartut 2019-imut sanilliullugit 2022-mi marloriaatinngorsimapput.
OBS. Qulaani takusassiami Ritalinit pisiarineqartut 2022-mi kvartalini pingasuni siullerni taamaallaat takutinneqarput.
Ukiuni kingullerni adhd-p oqaluuserineqarneruneranik, Ritalinit pisiarineqartartut amerleriarnerat tarnikkut nappaatilinnut immikkoortortaqarfimmit Ritalinit tunniunneqartartut amerleriangaatsiarnerat pissuteqarsinnaavoq.
- Adhd-eqarnermut iluaqutserneqarnissamik kissaateqarneq annertuneranik tamanna kinguneqarpoq, amerlanerusullu katsorsarneqalersimapput.
Nakorsaasiunneqartunik tuniniaasarneq
Nakorsaatinik nakorsaasiunneqartunik tuniniaasarneq aningaasartaqartorujussuunera ataatsimut isigalugu unammilligassartaqarpoq, Henrik L. Hansen nassuiaavoq, nangillunilu:
- Nakorsaatit unioqqutitsilluni tuniniarneqartarnerat akisoorujussuuvoq. Kalaallit Nunaanni aanngajaarniutit inerteqqutaasut akisunerannut attuumassuteqarsinnaavoq.
Taamaattumillu inuit ilaat nakorsaasiunneqartunik tuniniaasartut ajoraluartumik takussaasartut, Henrik L. Hansen oqaluttuarpoq.
- Maani taama pisoqartarnera uppernarsaatissaqartinngilara, kisianni inuuninni sulininni ajornartorsiut taanna siornatigut paasinikuuara.
Nakorsaaneqarfik piumaffiginnippoq
Nakorsaasiunneqartunik tuniniaasarnerup qanoq pinaveersaartinneqarsinnaanera pillugu Nunatta Nakorsaaneqarfia isumaliuteqarsimanersoq apeqqummut ima akivoq:
- Soorunami isumaliuteqarpugut.
Peqqinnissaqarfimmi sulisut nakorsiartunut nakorsaaserneqartunik sapinngisamik qanimut malitseqartitsisarnerisigut pinaveersaartinniarneqarsinnaasoq, Henrik L. Hansen isumaqarpoq, taamaalilluni iluaqutigineraat aamma nammineq atortarneraat malugineqarsinnaassaaq.
Nakorsaatillu nakorsaatilerivimmit tunniunneqartut aqaguani tuniniarneqarsinnaanerannut qulakkeerinnivittoqarsinnaanngitsoq, taassuma oqaatigaa.
Henrik L. Hansenip oqarnera naapertorlugu, una suliaq tunuliaqutigalugu Nunatta Nakorsaaneqarfiata napparsimasut Ritalininik tunineqartartut peqqinnissaqarfiup misissussagai piumaffiginnippoq, ilaasa naleqqutinngitsumik atortarneraat allanullu tunniuttarneraat qulakkeerniarsarissallugu.
