Unioqqutitsilluni Ritalinimik tuniniaasoqartarnera Kalaallit Nunaanni Politiit maluginiarpaat.

Vicepolitiinspektør Lars Bjerregaard ilisimatitsivoq. Misissuisarnermut taanna pisortaavoq.

Bjerregaardip oqarnera naapertorlugu, aqqusinermi suliniuteqartoqartillugu politiit Ritalininik naammattuuinerusarput. Kalaallit Nunaanni Politiit aanngajaarniutinik pinerlunnerit ataatsimut isigalugu ukkataraat, aqqusinerni kiisalu misissuinerni annerusunik suliaqartarlutik.

- 2022-mi misissuinitsinni qulingiluariarluta Ritalininik siumuisimanerput kisitsisaatitta takutippaa. Suliat nunatsinni siamasissumiipput – sulialli amerlanerit Nuummiipput, taanna nassuiaavoq.

Ritalin avatangiisiniittoq

Suliani Ritalinimut tunngasortallit ukiuni kingullerni malunnaatilimmik amerleriarsimanngitsut, Lars Bjerregaard ilisimatitsivoq. Kisianni, nangippoq:

- Taamaakkaluartoq Ritalin ukkataraarput, avatangiisini Ritali ataavartumik tusartaratsigu, ataavartumillu Nakorsaaneqarfimmut attaveqartarpugut ajornartorsiut oqaluuserisarlugu.

Ritalinimut tunngatillugu pinerluttut akornanni nakorsaatip tunniunneqartup inunnut allanut tuniniarneqartarnera takussaavoq, vicepolitiinspektøri nassuiaavoq.

Ritalin Danmarkimi misilitsinnernut assingusunullu atatillugu angusarissaarniarluni aanngajaarniutigineqartartutut ilisimaneqarpoq, Ritalin – Netdoktor naapertorlugu – takutitsinermi qiilatitsisinnaammat.

Sunniutai ilungersunartut

Tamatuma saniatigut nakorsaat saniatigut sunniuterpassuaqarpoq, ilaatigut qasulertoqarsinnaavoq, nikallungalertoqarsinnaavoq, aliasulertoqarsinnaallunilu.

Nunatsinni taamatut atuisoqarnersoq Kalaallit Nunaanni Politiit ilisimanngilaat.

- Ritalin atornerluisut akornanni tuniniarneqartarnera maluginiarparput. Allatut malugisaqanngilagut, Lars Bjerregaard oqarpoq.