Skip to main content

Angajoqqaat: Iisartakkanik atornerluineq ernitta imminut toqunneranik kinguneqarpoq

Politikeri inuusuttut akornanni iisartakkanik atornerluisoqarneranik mianersoqqussuteqarpoq. 17-inik ukiulimmut angajoqqaat ernertik pillugu saqqummerput, ajornartorsiutip ukkatarineqarnissaa kissaatigigamikku.

Methylphenidat, Ritalinitut ilisarisimaneqartoq unioqqutitsilluni tuniniarneqartarpoq.

Anna Wangenheim Demokraatineersoq Facebookimi taama allaaserisaqarpoq. Oqariartuut Kalaallit Nunaanni Politiinit aamma nakorsaanermit Henrik L. Hansenimit Sermitsiaq.AG-mut uppernarsarneqarpoq.

- Nakorsaatit aanngajaarniutaasussaanngillat allanullu attuumassuteqanngitsunut tuniniagassaannatik, pisariaqartitsisunut kinguneqartitsisoqarnissaa kissaatiginanngeqimmat.

Politikeri iisartakkanut Ritalininut innersuussilluni taama aallarniuteqarpoq, taakku narkolepsimut aamma adhd-mut katsorsaatitut atorneqartarput. Inuiaqatigiittut tarnikkut nappaatit paasisaqarfiginerulerlugillu ukkatarinerulersimagigut, Wangenheimip oqaatigaa, tamannalu pitsaasuunerarpaa.

Siooraneq imminullu toqunnissamik eqqarsarneq

Tamatuma saniatigut ajoqutitaqarnerarpaa: Nakorsaatinik nammineq atugassanik atornerluineq.

- Ajoraluartumilli inoqateqarpugut, aamma avataaniit tikerartunit, nakkutigineqanngitsumik nakorsaatinik atornerluisartunik, Anna Wangenheim allappoq.

Inunnut adhd-ertunut nakorsaammik pisartagaqarsinnaanerup ajornarnerulersinnaanera, taassuma ernumanartoqartippaa.

Ritalin annertuumik pigaanni aanngajaarnarsinnaavoq, amfetamininut imaluunniit kokaininut assingusumik sunniuteqartarluni; tassa piukkoorneq, qiimmanneq, imminut tatiginerulerneq aamma sinimmik nerinissamillu pisariaqartitsinnginnerulerneq.

Sunniutai malunnarunnaaleraangata qasorujussuarneq aamma nikalloqqajaaneq takkuttarpoq, Danmarkimi Peqqissutsimut Aqutsisoqarfik nittartakkamini taama ilisimatitsivoq. Piffissami sivisuumi annertuumik pisaraanni tarnikkut peruluttoqalersinnaavoq malersorneqartutullu qisuariartoqarsinnaasarluni. Ritalin aamma imminut toqunnissamik eqqarsalersitsisinnaavoq siooralersitsisinnaallunilu, taama allaqqasoqarpoq.

Ajorluinnartoq

Taakku ersiutit angajoqqaat marluk aasaanerani ernerminni inuusuttuaqqami malugisimavaat.

- Taakku (ernerat ikinngutaalu, aaqq.) iisartakkanik aserortereriarlutik sorlummikkut najuussortarpaat, ataataasoq oqaluttuarpoq.

Ilisimasat taakku ernermi nittartakkakkut attaveqaataanut isissutissarsinerup kinguneq pissarsiarisimavaat. Ritalin inuusuttuaqqap oktobarimi imminut toquttup ikinngutaasa akornanni ingerlaarsimasoq tassani paasinarsivoq.

Angajoqqaat kinaassusertik saqqummiukkusunngilaat, Sermitsiaq.AG kinaassusaannik ilisimannippoq.

- Amerlasuut atuisarnerat (Ritalinimik atornerluisarnerat, aaqq.) tupaallaatigaara. Atugaasorujussuuvoq. Taakkuninnga (iisartakkanik, aaqq.) qaammammut ataaseriarlutik illoqarfimmut tikittartunit pissarsisarlutik oqaluttunik paasisaqarpunga, angutaa oqaluttuarpoq.

Festernermi illoqarfimmiinnermilu aanngajaarniut

Angajoqqaat pisussaq tikillugu ernertik ernumagisimavaat, pissusilersorneralu maluginiarluarsimavaat.

- Nukappiaqqap imminut toqunnissani oqaatiginngisaannarpaa, kisianni unnummi tassani ilisarnanngivippoq, ataataasoq oqaluttuarpoq.

- Festernerminni illoqarfimmiitillutillu iisartakkanik pisartut, ilaqutariit ikinngutitta qanigisatta oqaluttuuppaatigut, taamaalillutik sivisunerusumik eqqumasarsimapput. Aliasoqqajaanerusalertoq pissusilersorneralu allanngortoq malugisinnaavarput, kisianni tamanna pillugu oqaloqatigiumanngilaatigut.

- Siornatigut ullaakkut suliartunnginnermini arfinernut makittarpoq, kisianni aasap kingorna siullermeerluni misiliinermi kingorna piumassuseerukkiartuinnarpoq, ilaatigullu sulinngitsoortalerluni.

Pinaveersaartitserusuttut

Ernerat illumi suliassanik ikiuutaanissamik oqarfigineqaraangami narralluni iniminukartartoq, angajoqqaat nassuiaapput, tamannalu tassunga nalinginnaanngitsoq.

- Imminut toqunneranut Ritalini tamakkiisumik pissutaasoq isumaqarpunga, ataataasoq oqarpoq.

Ritalininik tuniniaasartut arlallit ataataasup paasisimanerinik pissuteqartumik, angajoqqaat kinaassutsiminnik isertuusserusupput.

- Pingasunik paarerusutatsinnik paneqarpugut.

Ilaqutariit ernermi ikinngutaasa angajoqqaavinut kingorna attaveqarput, iisartakkanik atornerluisoqarneranik aarlerisaaruteqarlutik, tamanna sms-ikkut aamma Snapchatikkut paasisimagamikku.

- Allanut assingusumik pisoqarnissaa pinaveersaartikkusupparput, taanna oqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER