suliffissaaleqineq
Suliffissaaleqisut suli ikilioartorput
Novembarimi inuit suliffissarsiortut 318-inik siorna qaammammut tassunga sanilliullugit ikinnerupput
Novembarimi inuit 2.851-it suliffissarsiortutut nalunaarsorneqarsimapput, taakkunannga 507-it nunaqarfinneersut.
Tamanna katillugu ukiup siulianit qaammammi tassani 318-inik ikileriarneruvoq. Illoqarfinni suliffissarsiortut ikileriaataat katillugu 273-iupput, tamanna Naatsorsueqqissaartarfimmi kisitsisit saqqummiunneqartut takutippaat.
Atuaruk: Politikeri inuusuttoq: Pisortanit tapiissutit amerlineqartariaqanngillat
Inuusuttut suliffeqanngitsut
Ukioqatigiinnut agguarneqarneranni suliffissarsiortut amerlanerpaartaat angutit 20-24-illu akornanni ukioqarput. Angutit nunaqarfinniittut aamma taama ukiullit amerlanerullutik.
Arnat aamma suliffissarsiortut akornanni 20-24-illu akornanni ukiullit amerlanerpaapput.
Atuaruk: Suliffissarsiortut suli ikileriaqqittut
Suliffissarsiorlutik nalunaarsukkat saqqummersinneqartarput kommuninut suliffissarsiorsimasut tunngavigalugit. Qaammammi inuk ataaseq suliffissarsiortutut naatsorsugaasarpoq, qaammatip ingerlanerani ataasiarluni arlaleriarluniluunniit nalunaarsorneqarsimanera apeqqutaatinnagu.
Suliffissarsiortutut nalunaarsukkat qaammatikkaartumik saqqummersinneqartarput. Allaffissornikkut inatsisitigullu allannguineq suliffissarsiortutut nalunaarsukkat nikerarnerisa piffissap ingerlanerani mianersortumik paasineqassapput.
Atuaruk: Angutit amerlanerusut sulilersimapput
Assip ataani kisitsisitigut takusassiaq takuuk, illoqarfigisannilu nunaqarfigisannilu qanoq inissisimanersoq takullugu