Kommune Kujalleq
Politikeri inuusuttoq: Pisortanit tapiissutit amerlineqartariaqanngillat
Atassutip inuusuttaanni immikkoortortami ilaasortap Bentiaraq Ottosenip, Kommune Kujalliup suliffissarsiortuni ikiorsiissutit amerlisimammagit tupigusuppoq
Bentiaraq Ottosenip Atassutip Inuusuttaanni ilaasortaasup, Kommune Kujalliup suliffeqanngitsunut aningaasatigut ikiorsiissutini sooq amerliniarlugit aalajangersimanera tupigusuutigaa.
- Aningaasat atuarfiit pitsanngorsarneqarnerinut aamma meeqqerivinnut atorneqarsinnaagaluarput, taanna allappoq.
Kommunip taakku aallunnerusariaqarai taanna isumaqarpoq.
Atuaruk: Suliffissarsiortut suli ikileriaqqittut
Akileraarut apparneqarli
Suliffissarsiortunut pisortanit aningaasat ikiorsiissutit ukiuni aggersuni ikilisinneqarnissaat taassuma kommunalbestyrelsimut kaammattuutigaa.
- Siusinaartumik soraarnerussutisialinnut aamma soraarnerussutisiaqartunut tapiissutit qaffasinnerusariaqarput. Tamanna suliffissarsiortut pisartagaannik ikilisaanikkut pisinnaavoq, aamma kommunimut akileraarutip procentinik marlunnik apparneqarneratigut, Bentiaraq Ottosen oqarpoq.