Oqaatsit pillugit oqallinneq
SIK allamiut oqaasiinik atuiunnaarnissamut siorasaarivoq
SIK isumaqarpoq maani nunami nittarsaassisoqarniarpat aamma pinngitsoorani kalaallisut allassimasariaqartut. - Soorunami taamaattariaqarpoq Kalaallit Nunaanniikkatta, sulisartut kattuffiat taama nalunaaruteqarpoq
Sulisartut kattuffiata SIK-p paatsuunganartippaa Kalaallit Nunaanni Inuussutissarsiortunit oqariartuutigineqarmat inuit pisinnaatitaaffiinnik unioqqutitsinerusoq nioqqutissanik nittarsaassisarnissaq pillugu inatsisissamut kalaallisut aamma allaasimanissaat piumasaqaataassappat.
SIK-mi akerlerluinnaanik isumaqarpoq. Tassalu inuit pisinnaatitaaffiinik unioqqutitsinerussasoq Kalaallit Nunaanni nittarsaassat kalaallisut allassimassanngippata.
- Kalaallit Nunaanni Inuussutissarsiortut aammattaaq oqariartuuteqarput suliffeqarfinnut mikinernut aningaasarpassuarnik naleqassasoq kalaallisut aamma allasimanissaat piumasaqaataassappat. Aap, taamaassinnaavoq aamma taamaappoq, uagut ukiorpassuit tamanna malugisimavarput misigalugulu, kisianni tamanna akuerineqartariaqarpoq aningaasanilluunniit naleqassagaluarpat, SIK-p siulittaasua Jess G. Berthelseni allappoq.
Atuaruk: Siumup Inuussutissarsiortut isumaqatiginngilai
Atuaruk: IA: Oqaatsit pillugit oqallinnerup Inatsisartut avissaartuutsinngilaat
Kalaallisuinnaq attaveqalersinnaapput
Aviisip AG-ip sapaatip akunnerani uani saqqummersup allaaserisaatut Naalakkersuisut nittarsaassinermut inatsimmi oqaatsitigut piumasaqaatinut qasukkaamiartorput, taamaalilluni piumasaqaataajunnaariaannaalluni pinngitsoorani aamma kalaallisut nittarsaassisariaqarneq.
- SIK-p akuerisinnaanngilluinnarpaa taamatut inatsimmut qasukkaasoqassappat, piumasaqaataajunnaarluni kalaallisut aamma allassimanissaat. Taamatullu aaliangertoqassappat SIK-p eqqarsaatigeqqittariaqalissavaa SIK-p allaffeqarfiani siunissami allakkat anisussat kalaallisuinnaq allassimasalissasut, aammalu ataatsimiinnerni sumiluunniit kalaallisuinnaq oqalulluta saqqummiussisalernissaq uterfigisariaqalissagatsigu, taava kalaallisut paasisinnaanngitsut namminneq nutserisussaminnik pissarsisariaqalissapput, namminerlu tamanna aningaasartuutigalugu, sulisartut kattuffianni siulittaasoq taama allappoq.
Atuaruk: Oqaatsit pillugit Inatsisartuni oqallittoqarpoq
Oqaatsit pillugit oqallinnermut allaaserisaq aviisimi AG-mi sapaatip akunnerani matumani saqqummersumi atuarneqarsinnaavoq, aamma partiit assigiinngitsut isummersornerat soorlu atuarneqarsinnaasoq. Aviisi ugguuna pisiarineqarsinnaavoq: