Inatsisartut
IA: Oqaatsit pillugit oqallinnerup Inatsisartut avissaartuutsinngilaat
Nunatsinni minnerpaamik kalaallisut ussassaarisoqarnissaanik piumasaqarneq inuit pisinnaatitaaffiinik unioqqutitsinerunngitsoq Inuit Ataqatigiit isumaqarput
Aviisip AG-p sapaatip akunnerani uani saqqummersup allaaserisaatut, sapaatip akunnerani kingullermi Inatsisartuni ilaatigut sakkortusaarfiusumik – ilaatigullu misigissutsitigut attortiffiusartumik – kalaallit oqaasii pillugit oqallittoqarpoq. Tamatumunnga aallaaviuvoq nioqqutissanik nittarsaassisarneq pillugu inatsisissamut siunnersuut, suliarineqarnermini piffissaq kingulleq allanngortinneqartoq, taamaasilluni piumasaqaataajunnaarsinneqarluni nittarsaassat pinngitsooratik kalaallisut allasimasariaqarnerat.
- Allaganngorlugu ussassaarineq, allagartalersuineq aamma inini tamanit orninneqarsinnaasuni tuniniaa-nissamik nittarsaassineq minnerpaamik kalaallisut pissaaq.” Tassa taakkuupput Inuit Ataqatigiit saqqummiussaat.
Kingornatigullu Sulisitsisut Inatsisartuni ilaasortanut allagaqarnerminni Europamiut inuit pisinnaatitaaffii pillugit isumaqatigiissummut unioqqutitsinerarlugit tikkuussipput, Inuit Ataqatigiinnersoq Juliane Henningsen tusagassiuutinut nalunaaruteqarluni allappoq.
Juliane Henningsen nalunaaruteqarnera naapertorlugu Inuit Ataqatigiit tunngaviusumik naleqartitarilluinnarpaat kikkut tamarmik naligiittut pineqassasut kiisalu assiimmik ataqqinninnermik pinnittoqassasoq. Kikkuugaluarpata qanorluunniit oqaaseqartuugaluarpata.
Atuaruk: Oqaatsit pillugit Inatsisartuni oqallittoqarpoq
Ataqqeqatigiittoqarnissaa kaammattuutigaat
- Kalaallit Nunatsinni minnerpaamik minnerpaamik kalaallisut ussassaarisoqarnissaanik piumasaqarneq inuit pisinnaatitaaffiinik unioqqutitsinerunngilaq. Qularutissaanngilaq suliffeqarfik kalaallisuumut nutserisinnaasumik sulisoqanngippat suliffeqarfimmut unamminartuussasoq. Tamanna kikkunnulluunniit innarliinngilaq. Inuiaqatigiinni peqataatitsinissamut tamanna mattussinngilaq, Juliane Henningsen allappoq.
Imalu nangippoq:
- Killormuanilli tamanna periarfissiivoq. Killormuanilli pisoqarsinnaavoq, tassa suliffeqarfiit ataasiakkaat tunisinerunerannik kinguneqaratarsinnaavoq amerlanernit neqeroorutaasut paasineqarsinnaanngorpata.
Taamaattumik Inuit Ataqatigiit ataqqeqatigiilluni oqallittoqarnissaanut kaammattuuteqarput.
- Killeqanngitsumik oqaaseqarsinnaatitaaneq persuarsiutigaarput, eqqarsarluarlunili atorneqarnissaa qinnutigissavarput. Ingammik partiinit kiisalu soqutigisaqaqatigiit nuimasut akornanni – taakkumi oqaluttarnermikkut oqallittariaaseq qanoq ittuussanersoq aalajangeeqataaffigilluinnartarmassuk.
Oqaatsit pillugit oqallinnermut allaaserisaq aviisimi AG-mi sapaatip akunnerani matumani saqqummersumi atuarneqarsinnaavoq, aamma partiit assigiinngitsut isummersornerat soorlu atuarneqarsinnaavoq. Aviisi uani pisiarineqarsinnaavoq: