Oqaatsit pillugit oqallinneq
Siumup Inuussutissarsiortut isumaqatiginngilai
Kalaallit Nunaanni Inuussutissarsiortut oqaatsit pillugit oqallinnermi inuit pisinnaatitaaffiisa unioqqutinneqarsinnaaneranut oqariartuuteqarnera Siumup akerleraa
Inatsisartuni ilaatigut sakkortusaarfiusumik – ilaatigullu misigissutsitigut attortiffiusartumik – kalaallit oqaasii pillugit sapaatip akunnerani kingullermi oqallittoqarpoq. Oqallinnermut aallaaviuvoq nioqqutissanik nittarsaassisarneq pillugu inatsisissamut siunnersuut, suliarineqarnermini piffissaq kingulleq allanngortinneqartoq, taamaasilluni piumasaqaataajunnaarsinneqarluni nittarsaassat pinngitsooratik kalaallisut allasimasariaqarnerat.
Aviisip AG-ip sapaatip akunnerani uani saqqummersup allaaserisaatut Inatsisartuni oqallinneq namminersorlutik inuussutissarsiuteqartut akornanni ernumammisaarnermik aamma pilersitsivoq.
Atuaruk: IA: Oqaatsit pillugit oqallinnerup Inatsisartut avissaartuutsinngilaat
- Siumumi, Partii Naleqqami IA- milu oqaatsinik piumasaqaatit sukateriffigineqaqqinnissaannik isummat inuussutissarsiornermut annertuumik kinguneqarsinnaapput, taama Karsten Lyberth-Klausen, Kalaallit Nunaanni Inuussutissarsiortuni (siusinnerusukkut Kalaallit Nunaanni Sulisitsisut Peqatigiiffiat, aaqq.) allattoqarfiup pisortaa uparuaavoq.
Maanna Inatsisartuni Siumup gruppia nalunaaruteqarpoq inuussutissarsiuteqartut tamarmik innuttaasut sapinngisamik amerlanerpaat kiffartuussinerminni tuniniaanerminnilu oqaatsitigut peqataatinnissaat soqutigisariaqaraat isumaqarlutik.
- Siumumiit akuersaanngilarput kalaaliussuseq nikanartutut inissillugu nittarsaanneqarnera, oqallinnermilu partiit aalajangersimasut oqaatsinut ‘illersuinerat illersuinnginneralluunniit’ aallaavigalugu naqissusiiniartarneq pitsaasuungitsoq oqaatigisariaqarlugu, Suka K. Frederiksen, Siumup politikkikkut oqaaseqartartua allappoq.
Oqaatsit pillugit oqallinnermut allaaserisaq aviisimi AG-mi sapaatip akunnerani matumani saqqummersumi atuarneqarsinnaavoq, aamma partiit assigiinngitsut isummersornerat soorlu atuarneqarsinnaavoq. Aviisi uani pisiarineqarsinnaavoq: