Qeqqata Kommunia
Nunaqarfimmi atornerluisoqarnikuunerata kingorna suliniutinik aallartitsisut
Atammimmi marlunngorpat innuttaasunik ataatsimiititsisoqassaaq, tassani innuttaasut qanoq kissaateqarnersut tusarniaavigineqassapput, aamma suliniutit suut aallartinneqassanersut
Ukioq 2000-mi pisimasup saqqummerneqarnerata kingorna, Maniitsup kommunerisimasaanit Atammimmut orniguttoqartarsimavoq, innuttaasunillu paasititsiniaanerit ingerlanneqartarsimallutik.
Taamanikkut 18-it tikillugit ukiulinnut ikiorsiiniarnerit ingerlanneqartarput, aammalu Namminersorlutik Oqartussanit tikittoqarnikuusimavoq, ikiueqqaarneq ingerlanneqarluni, malitseqartitsinerillu ingerlanneqarlutik. Tarnip pissusaanik immikkut ilinniarsimasumik oqaloqatiginninnerit ingerlanneqarsimapput.
Atuaruk: Meeqqat atornerlunneqarsimasut inuunerup sinneranut sunnerneqartarput
Ukioq 2008 tarnip pissusaanik immikkut ilinniagaqartoq Maniitsup kommuniani atorfilik sapaatip akunneri pingasuni ataannartumik kinguaasiutikkut atornerlunneqarsimasunik katsorsaavoq. Atammimmi atorfilik naapertorlugu, inuusuttut pineqartut 18-ileereeraangata malitseqartitsisoqartarsimanngilaq.
- Inuusuttullu pisimasumik 2000-ip kingorna taamanikkut nassuernikuunngitsut kingunerlutitsisutut taaneqarput taakkusimallutillu ullumikkut pisariaqartitsisut, Qeqqata Kommunia allappoq.
Atuaruk: Meeqqanut inuusuttunullu atornerluinermut naaggaarneq
Innuttaasunik ataatsimiititsineq
Februarip 24-ani nunaqarfimmi akimortumik suleqatigiissitaq ataatsimiippoq, ataatsimiititaliallu aalajangerpaa, marsip arfineq-aappaani ullumikkut innuttaasunut ataatsimiisitsisoqassasoq.
- Suliniutit suut aallartinneqarnissaannik innuttaasut kissaataat tusarneqarnissaat ataatsimiisitsinissami ataatsimiititaliap siunertaraa, suliniutinullu aallartitassanut kommunalbestyrelsimi ilaasortat aningaasaliinissaminnik kissaateqarlutik, Qeqqata Kommunia erseqqissaavoq.
Siunissami qaninnerusumi Maniitsumi atuarfimmit tikittoqassaaq. Matumani Atammimmi atuarfimmi atorfillit, atuartut angajoqqaallu suleqatigiissinnaanissaat sammineqassaaq.
Atuaruk: Inersimasunut meeraarnerminni atornerlutsissimasunut siunnersuineq nutaaq
Suleqatigiinnermik aallartitsiniartut
Suut aallartinneqarsinnaanersut pillugit Maniitsumi Ilaqutariinnut Inerisaavik, pinaveersaartitsinermi siunnersorti, meeqqanut inuusuttunullu immikkoortortaqarfik piareersarlutik aallartereerput.
Qeqqata Kommuniata aamma Namminersorlutik Oqartussat akornanni suleqatigiinnissaq aallartikkumallugu, nunalu tamakkerlugu neqeroorutigineqartutut kinguaassiutitigut atornerlunneqarsimasut kingunerlutsitsinerinik ikiorserneqarnissaat anguniarlugu, Atammimmut angalasoqarnissaa siunertaralugu, Qeqqata Kommuniani qullersaqarfik Namminersorlutik Oqartussanik ataatsimeeqateqarnissaminik kissaateqarluni saaffiginnissuteqareerpoq, Qeqqata Kommunia allappoq.
Atuaruk: Nutaamik eqqarsartariaaseqarnissaq Meeqqat Illersuisuata ujartorpaa