Innuttut pisussaaffeqarneq
Nutaamik eqqarsartariaaseqarnissaq Meeqqat Illersuisuata ujartorpaa
– Pingaartumik nunaqarfinni innuttaasut arlalikkaat, meeqqanik inuusuttunillu sumiginnakkanik atornerlunneqartunilluunniit paasisaqaraangamik tamassuma kommunimut nalunaarutiginissaa ersissutigisarpaat, Aviâja Egede Lynge tikkuaavoq
Assersuutigalugu innuttaasut kinguaassiuutitigut atornerluinermik paasinnissimasut tamaasa tamakkuninnga nalunaaruteqartalersinniarlugit qanoq iliuuseqarsinnaavugut?
Taamatut aperivoq meeqqat illersuisuat Aviâja Egede Lynge, sapaatip akunnerani siusinnerusukkut Politimestereqarfiup 2015-imut kisitsisitigut takussutissat tamanut saqqummiutereeraalu.
Atornerluinerpassuit
Tassani takuneqarsinnaavoq nalinginnaasumik inatsisinik unioqqutitsinerit ikiliartortut.
2015-imi inatsisinik unioqqutitsinerit 31-usimapput, ukiup siuliani 54-iusimallutik. 2013-imilu meeqqanut inuusuttunullu kinguaassiuutitigut atornerluinerit 70-inik amerlassuseqarsimapput.
Nalunaarutiginninnissamut pisussaaffeqarneq
– Innuttaasut tamarmik nalunaarutiginninnissaminnut pisussaaffeqarput, inuinnaagaluarunik imaluunniit meeqqanik inuusuttunillu sammisaqarlutik sulisuugaluarunik. Nunatsinnili imaattoqarpoq innuttaasut arlalikkaat, pingaartumik nunaqarfitsinni, meeqqanik inuusuttunillu sumiginnarneqartunik atornerlunneqartunilluunniit paasisaqaraangamik tamassuma kommunimut nalunaarutiginissaa ersissutigisarlugu, meeqqat illersuisuat tusagassiorfinnut nalunaarutikkut tikkuaavoq.
Kanngusunneq
Tamakkuninnga nalunaarutiginninnissamut minnerunngitsumik ersissuteqartarput angajoqqaat ilaqutaasullu.
– Tamatumunnga pissutaasinnaavoq inuiaqatigiinni taama ikitsigisuni, imminnullu isumalluutigeqatigiillutik inuusuni, kinguneqaatissanut ersineq, kanngusunneq pisuusutullu misigisimaneq, taakkua kinguaassiuutitigut atornerluinermi misigisimaneqakulasarmata. Tamanna pissutigalugu meerarpaaloqassaaq ikiorneqanngitsunik, kinguaassiuutitigullu atornerluinermut kisitsisitigut takussutissiami takuneqarsinnaanngitsunik, Aviâja Egede Lynge mianersoqqusivoq.
Taassuma neriuutigaa nalunaaruteqariaatsinik, pisarnermit allaanerunik nassaartoqarsinnaassasoq.