Nivi Olsenip ilinniartut pillugit oqaatsini utoqqatsissutigai

Ilinniarnermut naalakkersuisoq, Nivi Olsen (D), Danmarkimi ilinniartut aningaasat ilinniarnermut atatillugu taarsigassarsiatik qarasaasianut, iPhonenut angalanernullu atortarnerarlugit, KNR-imut oqaatigisani maanna utoqqatsissutigaa.

Isumaliutigilluagaanngitsoq
Danskit naalakkersuisuisa ajorseriartitsinissamut pilersaarutaat pillugit oqallinnermi taamatut oqaaseqarneq pivoq, tassani Danmarkimi ilinniartut SU-mit eqqorneqassapput - kalaallillu ilinniartut inatsimmut ilaasut aamma eqqorneqassallutik.

Atuaruk: SU-mik pisartagaqarneq sukateriffigineqalersoq

Taamatut oqariartuuteqarneq isornartorsiorneqangaatsiarpoq. Naalakkersuisunullu ilaasortap taamatut oqaaseqarnini 'isumaliutigilluagaanngitsumik' oqaatigaa.

Atuaruk: Ilinniartut Nivi Olsenimut kamattupilussuit

Ilungersortartut
- Ilisimavara ilinniartut ilungersortartut ilinniakkatik aallullugit. Ilarpassuilu sunngiffimminni sulisarput ilinniarnerminni naammattunik inuussutissaqarumallutik. Taama pisut ataqqeqaakka. Taamaattumik oqaaserisimasakka utoqqatsissutigaakka – ajuusaarutigaakkalu, Nivi Olsen tusagassiuutinut nalunaarummi oqarpoq.

Naak utoqqatseraluarluni, kalaallit Danmarkimi ilinniartut danskit naalakkersuisuisa aaqqissuusseqqinnerinut eqqugaassappata, aningaasanik tapiissuteqarniarani politikerip naqissuserpaa.

Ilinniartunut tapiissutit tapiissutaannaajunnaarlutik taarsigassarsianngoriartornissaat, aaqqissuusseqqinnerup kingunerissavaa.

Immikkut iluaqutissat
Nivi Olsenip tassunga atatillugu tikkuarpaa, kalaallit Danmarkimi ilinniagaqartut, danskinit ilinniartunit pigineqanngitsunik immikkut ittunik iluaqutissaqartut:

• Danmarkimi ilinniarfinni aallartittartut killilersugaanerat avaqqullugu immikkut isuma­qa­­­tigiissutitigut kalaallit ilinniagaqartut tiguneqarsinnaasarput.
• Kalaallit ilinniagaqartut meeqqatik ilanngullugit Danmarkiliarnerminnut akiliunneqar­tarput, tamatumalu saniatigut ukiut tamaasa Kalaallit Nunaannut feeriarnissaminnut akiliunneqartarlutik. Tamatuma saniatigut pisattanik nassiussineq Namminersorlutik Oqartussanit akilerneqartarpoq meeraqaraanni imaluunniit inooqatigiikkaanni, aapparisaq qaammatinit 20-nit sivisunerusumik ilinniarfimmiittussaatillugu.
• Kalaallit ilinniagaqartut peqqinnissamut tunngasunik aningaasartuutinik akiliunneqarsinnaapput, immikkut atuartinneqarnissamut aningaasartuutinut akiliunneqarneq, ilinniagaqartunit Danmarkimeersunit annerusumik akileraarutinut ilanngaatissinneqar­neq, Ilinniagaq naammassereerlugu angerlarnermi taarsigassarsiat tamarmiusut akilerneqarnissaannut tapiiffigineqarnissaq.

Atuaruk: Avalak: - Kamappugut

Allani ajorseriartoqassasoq
Danskit SU-annit ajorseriartoqartillugu kalaallit ilinniartut Namminersorlutik Oqartussanit iluaqutserneqassappata, aningaasat aningaasaliissutinit allanit tigusariaqassasut politikerip aamma naqissuserpaa.

- Taamalu ilinniartitaanikkut suliassaqarfiit allat atugassakinnerulissapput. Pitsaanerussava? Taamaassasorinngilara, Nivi Olsen oqarpoq.

Ilinniartut kattuffiat Avalak aamma oqaloqatiginiarlugu neriorsuuteqarpoq. Ilinniartut siulittaasuat naapertorlugu, isumaqatigiissuteqarniarneq siornatigut iluatsissinnaasimanngilaq.