Avalak: - Kamappugut

Nipi uummaarillunilu aalajangersimavoq. Avalammi siulittaasoq, Pam Stach, qanoq isumaqarnerluni qularnanngitsumik oqaatigaa.

- Kamappugut, taanna naqissusiivoq.

Anneruniartoq isumamillu pigiliussisimasoq
Kamanneq ilinniarnermut naalakkersuisup Nivi Olsenip (D) SU pillugu KNR-imut oqaatigisaanik pissuteqarpq.

Danmarkimi ilinniartuuneq qanoq ittuunersoq, Nivi Olsenip paasisimanngikkaa, ilinniartut kattuffiat isumaqarpoq.

Naalakkersuisoq anneruniarlunilu isummanik pigiliussanik oqaluppoq, piviusullu tunngaviginagit oqaluppoq, Pam Stach oqarpoq.

Atuaruk: Ilinniartut Nivi Olsenimut kamattupilussuit

Atuakkanut angalanernuunngitsoq
Nivi Olsen KNR-imit apersorneqarnermini ilinniartut nunarsuarmi allanut sanilliullugit 'inuulluataartupilussuit' oqaatigaa.

- Ilinniarnerat tamaat akilertarparput. Ataatsimilluunniit akiliineq ajorput. Allaat aningaasat attartugaat soorlu qarasaasianut, iPhonenut angalanernullu atorsimasaat akilertarpavut, Nivi Olsen KNR-imut oqarpoq.

Tassanilu ilinniarnermut naalakkersuisoq eqqunngitsunik oqaluttoq, Avalak isumaqarpoq.

- Ilinniarnermi taarsigassarsiat qanoq atortarnerigut paasisimanngilaa. Aningaasat atuakkanut atortarpavut, angalanernuunngitsoq, Pam Stach naqissusiivoq.

Atuaruk: KNR: Kalaallit ilinniartut danskit inatsisaat malissagaat Nivip piumasaraa

Ataatsimiinnissamut piffissaqanngitsoq
Nivi Olsenip tamatumunnga ilisimasai killeqarneri pissutissaqarluartoq, Avalammi siulittaasoq isumaqarpoq. Tassami kattuffiup naalakkersuisoq oqaloqatiginissaa suli iluatsissimanngilaat.

- Oqaloqatigerusunngimmatigut ataqqinninnginnerusoq isumaqarpugut. Maajip qaammataani Nunatsinni angalavugut, kisianni ilinniarnermut naalakkersuisup ataatsimiinnissamut piffissaqarfiginngilaatigut, Pam Stach oqarpoq. Taanna Avalammi ilaasortaq alla peqatigalugu sapaatip-akunnera aamma ulluni qulini Nuummiipput.

Unammilligassat
Avalaap naalakkersuisumut ilaatigut nassuiarusussimagaluarpaa, Ilulissaneersuugaanni Ikastimmersunut sanilliullugu Danmarkimi piffissaq siulleq unammillernarnerusartoq.

- Kalaallit ilinniartut danskinit piffissami siullermi unamminartunik nalaataqarnerusarpput. Systemimut aamma kulturimut nutaarluinnarmut inissinniartussaavugut, taamatullu aamma siullermik attaveqarfigut pilersikkiartortussaallugit, Pam Stach oqarpoq, taassumalu amerlanerit ingerlalluartarnerarpai.

Danmarkimi ilinniartut periusissami ersinngitsut
Nivi Olsenip politikkiani kalaallit ilinniarluarsimasut kissaatigineqarnerat oqaatigineqartuartoq, Avalammi siulittaasup takujuminaatsippaa.

- Taassuma najukkatsinnit ungasissumut angalalluta ilinniagaqarnissamik anguniagarput akuersaanngilaa. Ilinniarnermut periusissatut pilersaarutaani 30-35-illu akornanni qupperneqartumi, Danmarkimi ilinniartut titarnertaani sisamaannarni allaqqapput.