Ilinniartut Nivi Olsenimut kamattupilussuit

Nivi Olsenip SU-mut inatsisit allanngorneqarnissaannut pilersaarutit pillugit KNR-imut oqaaseqaataa ilinniartunit qisuariarfigineqarpoq.

Kalaallit Danmarkimik ilinniagaqartut pillugit 'piisaarlutik' atugaqarnerannik oqaaseqarnera ingammik, ilinniartunit qisuariarfigineqarpoq.

Atuaruk: KNR: Kalaallit ilinniartut danskit inatsisaat malissagaat Nivip piumasaraa

- Nukatsitaanngilagut
Avaruna Mathæussen Københavns Universitetimi medicinimik ilinniagaqarpoq, taannalu Facebookimi takinerusumik allagaqarpoq.

- Ilinniartuulluni piisaaginnartoqaranilu ilorrisimaarnerinnaanngitsoq assersuutissarpassuaqarpunga, taanna ilaatigut allappoq.

Taannalu politikerinut ersarissumik kajumissaaruteqarpoq:

- Kalaallit ilinniartut nukatsitatut oqaatigiunnaarniarsigit!

Qisuariartorpassuit
Avaruna Mathæussenip allataa maanna ilinniartunit ilinniartuusimasunillu amerlasuunit qisuariarfigineqarpoq.

- Danmarkimi nammineerluni ilinniarsimanngikkaanni, kalaallit Danmarkimi inuulluataartutut taassallugit ajornarsimanavianngilaq, Ivalu Lynge Christensen, Danmarkimi siornatigut ilinniarsimasoq taama allappoq, Nuummilu ilinniarnermut sanilliullugu ajornarnerusoq taanna isumaqarpoq.

- Taamatut oqaaseqannginnermini piviusut inisseqqaartariaqaraluarpai, Bjørn Olsvig Frederiksen-Krogh, Københavnimi perorsaasunngorniartoq allappoq.

Angerlarnissaq ornigiunnaaraat
Taamatut oqariartuuteqarnerit ilinniareernermi angerlarnissamut piumassuseqalersitsinngitsut arlaqartut oqaatigaat.

- Maani Danmarkimi inuulluataartugut nunaqqatigut isumaqarunik, naggataatigut kalaallit ilinniagaqartut angerlarnissartik ornigiunnaassavaat, Jimmy Dennis Pedersen allappoq, taanna Skagenimi Skipperskolenimi ilinniartuuvoq.

- Nivip Kalaallit Nunaata siunissaanik tamaviaaruteqartussaagaluarpoq, kisianni naamik, ilinniartunut ajornarnerulersitsiniarpoq, Gerth P. Olsen allappoq, taanna Copenhagen Business Schoolimi ilinniarsimavoq.

Avaruna Mathæussenip aamma Kalaallit Nunaat ilinniarluarsimasunik pisariaqartitsisoq oqarpoq.

- Kalaallit Nunaat ilinniagartuunik annertuumik pisariaqartitsivoq, eqeerlusi ilinniartut tamaviaarunniarsigit, taassuma allatani naggaserpaa.