Kalaallit sekundi kingulleq atorlugu ajugaapput

- Pissanganarluinnarpoq.

Taama Grønlands Håndbold Forbund, Puerto Ricop Nunattalu Panamerikami pissartanngorniunnissamut anngunniunnerni pingasunngornermi unamminerat pillugu naliliivoq.

Unamminerup immikkoortuani siullermi minutsinik 30-nik sivisussuseqartumi Nunarput målinik ataatsinik marlunnilluunniit siuarsimarusaarpoq, taamaalillunilu aamma unamminerup immikkoortua siulleq naammassillugu 13-12-mik siuarsimalluni.

Unamminerup immikkoortuata aappaani Puerto Ricomiut, nunaqqatiminnit illersorneqarluaqalutik siuarsimapput, immikkoortumilu tassani målinik marlunnik pingasunilluunniit siuarsimarusaarlutik.

Nunarpullu unamminerup naammassinissaa 5 minutsinik sioqqullugu unammisaminut 24-24 nalingiilerpoq.

Atuaruk: Kalaallit pointinnaqqittut

Frikasti aalajangiisuuvoq
- Unamminerup naammassinissaanut 20 sekundit amigaataaginnalersut Puerto Rico 26-26-mik nalingiisitsilerpoq. Kisianni saassussinermi kingullermi Nunarput frikastimik tunineqarpoq, Lykke Frank Hansenillu periarnissaa piareersarneqalerluni - kisianni aamma frikasti nutaaq tunniunneqaqqippoq, Grønlands Håndbold Forbundi taama ilisimatitsivoq.

Grønlands Håndbold Forbundimit ilisimatitsissutigineqarpoq piffissami tassani unamminermut piffissaliussaq qaangiuteersimasoq, taamaattumillu toqqaannartumik måleriartoqartussanngortoq.

- Frikasterneq unammiffiup saamiatungaanit målinit 10 meterimik ungasitsumipajaaq pivoq. Mia Egedep assersuisut qulaallugit måleriarpoq målit isuatungaasigut, taamaalillunilu Nunarput anngunniunnermi siullerpaamik ajugaasillugu 27-26-imik, håndboldforbundermiut taama allapput.

- Unamminerup immikkoortuani siullermi aqutsisooriarluta, unamminerup immikkoortuata aappaani teknikkikkut kukkuluttortaarnitsigut målinik pingasunik kinguarpugut. Tamatumalu kingorna unamminermut anngunniartariaqalerluta. Tamannalu naggataagut iluatsippoq, nunanut allanut unammisartut sungiusaasuata ikiortaa, Johannes Groth oqarpoq.

Atuaruk: Kalaallit unamminermi siullermi naligiittut

Taannalu ima nangippoq:

- Assersuinerput pingasunngornermi unamminitsinni iluatsippoq, taamaattorli saassussisarnerput unamminermi tullermi pitsanngoriartinneqarsinnaavoq.

Johannes Grothip nangilluni oqaluttuaraa Lykke Frank Hansen minutsini 60-ini unamminerup ingerlanerani tamapajaami paarineqarsimasoq, tamannalu assammik arsartut unamminerannut sunniuteqarsimasoq.

- Kisiann tassa massakkut ajugaasimalerpugut, anngunniunnermilu suli ajorsartinneqarsimanata, Johannes Groth oqarpoq.

Atuaruk: Puerto Rico: Anngunniunnissaq sioqqullugu ajugaaneq

Danmarkimi VM-imut aqqut
Anngunniunnerit ataasinngornermiit sapaat ilanngullugu ingerlanneqassapput. Cuba aammattaaq nunat angusarinnerit sisamat Panamerikami pissartanngorniunnissamut ingerlaqqissapput.

Pissartanngorniunnerit Cubap illoqarfiani Havanami maajip 21-anit 28-anut ingerlanneqassapput.

Panamerikami pissartanngorniunnermi, Pamamerikanske Mesterskabimik taaneqartartumi, angusarinnerit sisamat VM-imut Danmarkimi decembarimi pisussamut ingerlaqqissapput.

Unamminermi angusat, inissiffiit unamminerillu imaqarnialiaat uani takukkit panamhandball.org